İranda cinsi yolla yoluxma üçün xarakterik olan QİÇS halları artıb. Bu barədə İranın IRINN xəbər kanalının rəsmi xəbər saytı məlumat verir.
"İranın Səhiyyə Nazirliyinin son statistikasında göstərilir ki, 2010-cu ilin mart ayının 21-dək olan statistikaya əsasən, ölkədə 20 975 nəfər QİÇS-ə yoluxub. Bu rəqəm 2009-cu ilin dekabr ayında 20 130 nəfər olub", - məlumatda bildirilir.
Səhiyyə Nazirliyinin statistikasında bildirilir ki, 2010-cu il martın 21-dək QİÇS-ə yoluxanların 75 faizi narkotik maddələri iynə vasitəsilə qəbul etməklə, 17,9 faizi isə cinsi əlaqə ilə bu virusa yoluxublar. Bu göstərici 2009-cu ilin dekabr ayında müvafiq olaraq 76,6 faiz və 13,3 faiz təşkil edib.
Bu rəqəmlər onu göstərir ki, cinsi əlaqə ilə virusa yoluxanların sayı 5 faiz artıb.
İranın AİDS ilə mübarizə komitəsi ölkədə cinsi əlaqə ilə QİÇS-ə yoluxma hallarının artması haqqında xəbərdarlıq edib. Komitə elan edib ki, araşdırmalar göstərir ki, ölkədə 83-120 min nəfər QİÇS virusunun daşıyıcısıdır, lakin bu virusa yoluxanların yalnız 21 minə yaxını aşkar edilib. İranda 2010-cu ilin mart ayınadək QİÇS-ə yoluxmuş 3624 nəfər vəfat edib.
QİÇS nadir xəstəliklərdəndir ki, İranda bir sıra mental və dini səbəblərə görə gizli saxlanılıb, eləcə də insanlar bu xəstəliyin necə yayılması haqqında məlumatsız olduqlarından, bu ölkədə HİV-ə yoluxanların sayı kəskin artıb.