Bakı. Trend:
İtaliya Nazirlər Şurasında Suriyadakı mövcud vəziyyətlə bağlı iclas keçirilib.
Trend xəbər verir ki, İtaliyanın Baş naziri Ciorcia Meloninin sədrliyi ilə keçirilən toplantıda Baş nazirin müavini, xarici işlər və beynəlxalq əməkdaşlıq naziri Antonio Tayani, müdafiə naziri Quido Krosetto, daxili işlər naziri Matteo Piantedosi, təhlükəsizlik xidmətləri və məxfi qurumların rəhbərləri iştirak ediblər.
Görüş zamanı Suriyadakı vəziyyətin ilkin nəticələri və bu çərçivədə atılacaq addımlar müzakirə edilib. Toplantıda aşağıdakı məsələlərə xüsusi diqqət yetirilib:
- Suriyanın bəzi bölgələrində döyüşlərin davam etdiyi bir
şəraitdə mülki əhalinin təhlükəsizliyi prioritet olaraq
vurğulanıb.
- Dinc və əhatəli keçidin təmin edilməsi zərurəti qeyd olunub.
- Suriyada yaşayan İtaliya vətəndaşlarının təhlükəsizliyinin təmin
edilməsi və bütün azlıqların qorunmasının vacibliyi müzakirə
edilib.
- Bununla yanaşı, İtaliya hökuməti, digər Avropa ölkələri kimi,
Suriyadan sığınacaq tələbləri ilə bağlı prosesləri dayandırmaq
barədə qərar qəbul edib. Dəməşqdə diplomatik fəaliyyətin davam
etdirilməsi məsələsi də təsdiqlənib.
İclasın yekununda bildirilib ki, İtaliya hökuməti regional, Avropa və G7 tərəfdaşları ilə sıx əməkdaşlıq edərək, Suriyadakı vəziyyəti yaxından izləməyə davam edəcək.