Bakı. Trend:
İranın mərkəzində yerləşən İsfahan vilayətində ABŞ və İsrailə məxsus 2 ədəd pilotsuz uçuş aparatı (PUA) vurulub.
Trend-in məlumatına görə, bu barədə İran mediası məlumat yayıb.
Məlumata görə, İran İslam İnqilabı Keşikçilər Korpusu (SEPAH) ABŞ-yə məxsus “MQ9” PUA-sını, İran ordusu isə İsrailə məxsus “Hermes 900” PUA-sını vurub.
28 fevraldan bəri İranda 162 ədəd PUA-nın İranın Hava Hücumundan Müdafiə Sistemi tərəfindən vurulduğu qeyd olunur.
Qeyd edək ki, fevralın 28-də ABŞ və İsrail İrana qarşı hərbi əməliyyatlara başlayıb. Zərbələr ölkənin ən böyük şəhərlərinə, o cümlədən Tehrana endirilib. Ağ Ev hücumu İslam Respublikasından qaynaqlanan raket və nüvə təhdidləri ilə əsaslandırıb. İrana endirilən zərbələr nəticəsində ölkənin ali rəhbəri ayətullah Əli Xamenei və rəhbərliyin bəzi digər əsas fiqurları həlak olub. İranın İnqilab Keşikçiləri Korpusu İsrailə qarşı genişmiqyaslı cavab əməliyyatı həyata keçirdiyini bəyan edib. İran eyni zamanda ballistik raketlər, qanadlı raketlər və pilotsuz uçuş aparatları ilə ABŞ-nin Bəhreyn, İordaniya, İraq, Qətər, Küveyt, BƏƏ, Oman, Səudiyyə Ərəbistanı və Suriyadakı obyektlərini hədəfə alır.
Münaqişə nəticəsində regionun enerji infrastrukturu və dəniz nəqliyyatı da ciddi risk altına düşüb. Hörmüz boğazı ətrafında təhlükəsizlik gərginliyi səbəbindən dünya bazarında neft qiymətləri kəskin artıb. İran Hörmüz boğazına nəzarəti tam şəkildə özündə saxlayaraq sadəcə lazım bildiyi gəmilərin boğazdan keçməsinə icazə verir.