...

Məhkəmə DTX-nin keçmiş MTN generallarına qarşı 1 milyon manatlıq iddiasını təmin etdi

Gündəm Materials 23 Aprel 2018 16:30 (UTC +04:00)
Bakı Hərbi Məhkəməsi Dövlət Təhlükəsizlik Xidmətini ləğv edilmiş Milli Təhlükəsizlik Nazirliyinin sabiq əməkdaşlarına qarşı 1 milyon manatlıq iddiasını təmin edib,
Məhkəmə DTX-nin keçmiş MTN generallarına qarşı 1 milyon manatlıq iddiasını təmin etdi

Bakı. Samir Əli - Trend:

Bakı Hərbi Məhkəməsi Dövlət Təhlükəsizlik Xidmətinin (DTX) ləğv edilmiş Milli Təhlükəsizlik Nazirliyinin sabiq əməkdaşlarına qarşı 1 milyon manatlıq iddiasını təmin edib.

Trend-in məlumatına görə, prosesdə təqsirləndirilən generalların rütbədən azad edilməsi barədə ölkə Prezidentinə, digər şəxslərin rütbəsi ilə bağlı müvafiq orqanlara təqdimat göndərilməsi barədə qərar elan olunub. Məhkəmədə "Daşkəsən" epizodu üzrə 686 min manatlıq mülki iddiası və zərərçəkmiş iş adamı Kamal Seyfullayevin 2 milyon manatlıq mülki iddiası təmin edilməyib. DTX-nin 1 milyon manatlıq mülki iddiası isə təmin olunub. Bəzi zərərçəkmişlərin mülki iddiası isə qismən təmin edilib.

Qeyd edək ki, bu gün Sabunçu Rayon Məhkəməsinin binasında Bakı Hərbi Məhkəməsinin sədri Həbib Həsənovun sədrliyi ilə keçirilən prosesdə təqsirləndirilən şəxslərə hökm oxunub.

Məhkəmənin hökmü ilə Sübahir Qurbanov 14 il azadlıqdan məhrum edilib. Digər təqsirləndirilənlər - Füzuli Əliyev 14 il, Zaur Məmmədov 10 il 6 ay, Natiq Alıyev 10 il 6 ay, Teymur Quliyev isə 12 il azadlıqdan məhrum edilib.

Hökmə əsasən, Fərhad Atayevə 3 il sınaq müddəti təyin edilməklə şərti cəza seçilib və o, məhkəmənin iclas zalından azadlığa buraxılıb.

Həmçinin iş üzrə təqsirləndirilən Natavan Mürvətovaya 5 il şərti cəza verilib, Elşad Əzizov, Eşqin Əliyev və Anar Şirəliyevin hər biri 3 il sınaq müddəti olmaqla azadlıqdan şərti məhrum ediliblər.

Xatırladaq ki, dövlət ittihamçısı çıxışında Sübahir Qurbanovun 16 il, Teymur Quliyevin 16 il, Natavan Mirvətovanın 12 il, Füzuli Əliyevin 15, Zaur Məmmədovun 13, Natiq Alıyevin 14, Fərhad Atayevin 7, Anar Şirəliyevin 7, Eşqin Əliyevin 7 və Elşad Əzizovun 8 il müddətinə azadlıqdan məhrum edilməsini tələb edib. Həmçinin prokuror təqsirləndirilən generalların rütbədən azad edilməsi barədə ölkə Prezidentinə, digər şəxslərin rütbəsi ilə bağlı müvafiq orqanlara təqdimat göndərilməsini istəyib.

O, zərərçəkmişlərin mülki iddiaları ilə bağlı qanuna uyğun qərar verilməsini tələb edib.

Bundan başqa, dövlət ittihamçısı təqsirləndirilən şəxslərə qarşı Dövlət Təhlükəsizliyi Xidmətinin (DTX) 1 milyon manatlıq mülki iddiasının təmin olunmasını istəyib.

Bundan başqa, o, təqsirləndirilən şəxslərin üzərinə həbs qoyulmuş mülklərinin müsadirə olunması ilə bağlı qanunauyğun olaraq qərar çıxarılmasını tələb edib.

MTN-in sabiq baş idarə və idarə rəisləri - Sübahir Qurbanov, Teymur Quliyev, Natavan Mirvətova, eləcə də həmin qurumun digər vəzifəli şəxsləri - Füzuli Əliyev, Zaur Məmmədov, Natiq Alıyev, Fərhad Atayev, Anar Şirəliyev, Eşqin Əliyev və Elşad Əzizov 2015-ci ildə həbs olunublar.

Məqalədə:
Xəbər lenti

Xəbər lenti