Azərbaycan, Bakı, 27 yanvar / Trend , müxbir S.Kazımlı / Bakının Suraxanı rayonunun ərazisindəki qəzalı vəziyyətdə olan beş mərtəbəli binanın sökülüb-sökülməməsi məsələsi araşdırmalardan sonra məlum olacaq. Hazırda həmin ərazidə araşdırmalar aparılır, çərşənbə axşamı Trend -a Suraxanı rayon İcra Hakimiyyətindən (RİH) məlumat verilib.
Trend -un arayışı: Yanvarın 22-də saat 23:30 radələrində rayonun Zığ yolu deyilən ərazisində yerləşən 21 b saylı iki bloklu binanın çökmə ehtimalı olduğu üçün binanın sakinləri oradan evkuasiya olunublar.
RİH-dən bildiriblər ki, hazırda Fövqəladə Hallar Nazirliyinin əməkdaşlarından ibarət komissiya həmin ərazidə araşdırmalar aparır. "Hələlik hadisənin torpaq sürüşməsindən və yaxud da başqa səbəbdən baş verməsi dəqiq bilinmir. Həmin ərazidən torpaq nümunələri götürülərək ekspertizaya göndərilib. Binada zədə və çatların yaranma səbəblərinin müəyyən edilməsi üçün araşdırmalar davam edir"- deyə RİH-dən deyiblər.
RPİ-dən əlavə ediblər ki, binadan evakuasiya edilən 80 sakin yaxın qohumlarının evlərində müvəqqəti yerləşiblər, binada xoşagəlməz hadisələrin baş verməməsi üçün isə mənzillərin qapıları möhürlənib. "Binanın sökülüb-sökülməməsi haqda qərar olmadığı üçün hələlik sakinlərə kompensasiyaların verilməsi məsələsi gündəmdə deyil. Yaxın günlərdə məsələyə aydınlıq gətiriləcək", - deyə RİH-dən bildiriblər.
RİH-dən deyiblər ki, bina 1992-ci ildə inşa edilib, amma dövlət komissiyası tərəfindən qeydiyyatdan keçməyib. "Binada 2000-ci ilin noyabr ayında baş verən zəlzələdən sora çatlar yaranıb və qəzalı bina kimi qeydiyyatdan keçib. Bu barədə Bakı şəhər İcra Hakimiyyətinə və Nazirlər Kabinetinə məlumatlar verilib"- deyə RİH-dən qeyd ediblər.
Məqalə müəllifi ilə əlaqə ünvanı:[email protected]
