Bakı. Trend:
Səsvermə məntəqələrinin bağlanmasından sonra seçki məntəqələrindən açıqlanan çıxış sorğularına əsasən, İsveçdə parlament Riksdaqa keçirilən seçkilərdə sol müxalifət ifrat sağın da daxil olduğu sağ alyansı qabaqlayır. İfrat sağ isə mövqelərini itirir.
İctimai televiziya kanalı SVT-nin Bakı vaxtı ilə saat 22:00-da keçirdiyi sorğunun nəticələrinə əsasən, sol qüvvələr səslərin 51,3 faizini, ifrat sağçı İsveç Demokratlarının (SD) dəstəklədiyi sağ qüvvələr isə 46,8 faizini qazanır. İsveç Demokratlarının 2010-cu ildə parlamentə daxil olmasından sonra ilk dəfə səslərini itirəcəyi və İsveçin ikinci ən böyük siyasi partiyası statusunu əldən verəcəyi gözlənilir.
TV4 telekanalı üçün keçirilmiş digər sorğuya əsasən, sol qüvvələr 51,3 faiz, hazırkı hakim koalisiya isə 47 faiz səs toplayır. Sosial-demokratların seçki qərargahında toplaşan tərəfdarlar ifrat sağın gerilədiyini öyrəndikdə sevincdən qışqıraraq “Küçələrimizdə irqçilərə yer yoxdur” şüarını səsləndiriblər.
Səhiyyə və əhalinin alıcılıq qabiliyyəti məsələlərinin üstünlük təşkil etdiyi seçki kampaniyası zamanı sol və mərkəzçi qüvvələr uzun müddət sorğularda öndə olublar. Lakin 2022-ci ildə formalaşan və parlamentdə ifrat sağla müttəfiq olan sağ yönümlü hakim koalisiya seçki yarışının son günlərində yenidən fəallıq qazanıb.
