Azərbaycan, Bakı, 28 iyul /Trend/
İlkin məlumatlara görə, Mahaçqalada Dağıstan prezidentinin mətbuat xidmətinin və Analitik İnformasiya İdarəsinin rəhbəri Harun Qurbanov və onun sürücüsü öldürülüb. Trend-in məlumatına görə, bu barədə cümə axşamı RİA Novosti-yə respublikanın DİN nümayəndəsi məlumat verib.
"İnsident yerli vaxtla saat 08:15-də Montaşeva küçəsində baş verib. Naməlum şəxslər Qurbanovun "Toyota Camry" avtomobilini atəşə tutublar. İlkin məlumatlara görə, məmur və onunu sürücüsü həlak olub", - agentliyin müsahibi bildirib.
Mahaçqalanın Daxili İşlər İdarəsində olan mənbə RİA Novosti-yə bildirib ki, cinayətkarlar Qurbanova onun evindən çıxaraq maşına tərəf gəldiyi zaman atəş açıblar.
"Hadisə yerində operativ-istintaq qrupu işləyir, təfərrüatlar araşdırılır", - mənbə əlavə edib.
İK-nın Dağıstan üzrə İstintaq İdarəsinin nümayəndəsi Qurbanovun və onun sürücüsünün həlak olmasının sui-qəsd nəticəsində baş verdiyini təsdiqləyib. "Hazırda ilkin təhqiqat aparılır, işlə bağlı bütün vəziyyət dəqiqləşdirilir", - agentliyin müsahibi bildirib.
Qurbanov Harun Məhəmməd oğlu 1962-ci ildə DMSSR-in Dahaday rayonunun Kunki kəndində anadan olub. 1984-cü ildə Dağıstan Dövlət Tibb İnstitutunu bitirdikdən sonra Kaspiysk şəhərinin dağ müalicə birliyində həkim terapevt kimi fəaliyyətə başlayıb.
Dağıstan Dövlət Universitetinin aspiranturasını bitirdikdən sonra 1991-ci ildən 2000-ci ilədək baş müəllim, dosent, DDU-nun Tarix və mədəniyyət nəzəriyyəsi kafedrasının professoru səlahiyyətlərinin icraçısı olub. 1993-cü ildən 1997-ci ilədək "Birja xəbərləri" qəzetinin baş redaktoru olub. Elə həmin dövrdən "Bazar kommunikasiyaları agentliyi" İA-ya rəhbərlik edib.
2000-ci ildən 2004-cü ilədək Rusiyanın Mətbuat, teleradoyayım və kütləvi kommunikasiya vasitələri işləri üzrə Şimali Qafqaz Ərazi İdarəsinin baş mütəxəssisi olub.
2003-cü ildə "Dağıstan" Respublika Dövlət Yayım Şirkətinin baş direktoru təyin edilib. 2008-ci ilin oktyabrında Dağıstan prezidentinin əmri ilə Dağıstanın milli siyasət, informasiya və xarici əlaqələr naziri təyin edilib. 2010-cu ildə öz istəyi ilə nazir vəzifəsindən istefa verib. Elə bu ilin martında Dağıstan prezidentinin mətbuat xidmətinin və Analitik İnformasiya İdarəsinin rəhbəri təyin edilmişdi. Fəlsəfə elmləri doktoru idi.