Azərbaycan, Bakı, 21 aprel /Trend, müxbir S. Ağayeva/
Pakistanda bir gün əvvəl baş verən aviaqəzada ölənlər arasında Azərbaycan vətəndaşları yoxdur. Bu barədə şənbə günü Trend-ə Azərbaycanın Pakistandakı səfirliyindən məlumat veriblər.
Cümə günü Pakistanın paytaxtı İslamabadın yaxınlığında qəzaya uğrayan "Boeing 737" sərnişin təyyarəsinin göyərtəsində olan 127 nəfərin hamısı ölüb.
Məlumata görə, təyyarə Pakistanın iri şəhəri Kəraçidən istiqamət alıb və yerli "Bhoja Airline" aviaşirkətinə məxsus olub.
Yerli telekanallar da məlumat veriblər ki, aviaqəza pis hava şəraiti səbəbindən baş verə bilər. Təyyarə paytaxt İslamabadın yaxınlığında yerləşən Çaklala hərbi aviabazanın ətrafına düşüb.