Bakı. Trend:
Quba rayonu, Alekseyevka kəndində vətəndaşa məxsus fərdi yaşayış evində yanğın və partlayış baş verib.
Trend xəbər verir ki, Fövqəladə Hallar Nazirliyinin (FHN) “112” qaynar telefon xəttinə hadisə barədə məlumat daxil olan kimi, Dövlət Yanğından Mühafizə Xidmətinin Quba rayon Yanğından Mühafizə Hissəsinin əməkdaşları əraziyə cəlb edilib.
Araşdırmalar nəticəsində 1961-ci il təvəllüdlü Babayev Bədiyar Cavanşir oğluna məxsus, ümumi sahəsi 80 kv.m olan birmərtəbəli yaşayış evində yanğınla nəticələnən partlayışın baş verdiyi müəyyən olunub.
Yanğınsöndürənlər hadisəyə operativ müdaxilə edərək alovun genişlənməsinə imkan vermədən yanğını söndürüb və ərazidə təhlükəsizlik tədbirləri həyata keçiriblər.
Partlayış dalğası nəticəsində evə ciddi ziyan dəyib, yanğın zamanı dam örtüyünün 40 kv.m-lik sahəsi yanıb. Hadisə nəticəsində bir nəfər bədən xəsarətləri alıb.
