Qazaxıstan, Almatı, 17 iyul /Trend, xüsusi müxbir S.Süleymanov/
Qazaxıstan Rusiya Prezidenti Dmitri Medvedevin Ermənistan-Azərbaycan münaqişəsinin nizamlanması üzrə səylərini dəstəkləyir. Bunu Qazaxıstan Prezidenti Nursultan Nazarbayev Almatıda ATƏT-in xarici işlər nazirlərinin sammitinin açılış mərasimində deyib.
"Qazaxıstan ardıcıl surətdə ATƏT-in cavabdehlik zonasında yubadılmış münaqişələrin nizamlanması üzrə danışıqlar formatını irəli sürür, yubadılmış münaqişələr üzrə xüsusi nümayəndə fəal şəkildə çalışır. Azərbaycan və Ermənistan prezidentləri arasında Dağlıq Qarabağ problemi üzrə görüşlər silsiləvi keçirilib", - Nazarbayev deyib.
Nazarbayev bildirib ki, bu gün burada ATƏT-in Minsk qrupunun Dağlıq Qarabağ üzrə həmsədrlərinin iclası keçiriləcək. Biz bu görüşdə uğurlu işlər arzulayırıq.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.
BMT Təhlükəsizlik Şurasının Dağlıq Qarabağın və işğal olunmuş ərazilərin azad edilməsinə dair qəbul etdiyi dörd qətnaməni Ermənistan bu günə qədər yerinə yetirməyib.