...

Dağlıq Qarabağ münaqişəsi ilə bağlı Azərbaycanın haqlı mövqeyini dəstəkləyən parlamentlərin sayı artacaq

Ermənistan-Azərbaycan münaqişəsi Materials 3 Dekabr 2010 14:52 (UTC +04:00)
Dağlıq Qarabağ münaqişəsi ilə bağlı Azərbaycanın haqlı mövqeyini dəstəkləyən parlamentlərin sayı artacaq

Azərbaycan, Bakı, 3 dekabr /Trend, müxbir M.Əliyev/

Dağlıq Qarabağ münaqişəsi ilə əlaqədar Azərbaycanın haqlı mövqeyini dəstəkləyən qətnamələri qəbul edəcək parlamentlərin sayı artacaq. Bunu cümə günü Trend-ə Azərbaycanın Avropa Şurası Parlament Assambleyasındakı nümayəndə heyətinin rəhbəri Səməd Seyidov bildirib.

"Ümumi tendensiya ondan ibarətdir ki, Azərbaycanın haqlı mövqeyini dəstəkləyən ölkələrin, təşkilatların, yüksək səviyyəli insanların və dövlət başçılarının sayı getdikcə artır və artacaq. Çünki Dağlıq Qarabağ həqiqətini bütün beynəlxalq təşkilatlar - BMT, ATƏT, Avropa Şurası, AŞ PA bunu öz sənədlərində əks etdiriblər və bu təşkilatların üzvləri bütün dünya ölkələridir", - Seyidov bildirib.

İtaliya və Almaniyanın qanunvericilik orqanları Cənubi Qafqaza dair qəbul etdikləri qətnamələrdə Dağlıq Qarabağ münaqişəsinin Azərbaycanın ərazi bütövlüyü əsasında həll edilməsinin zəruriliyini göstəriblər.

Nümayəndə heyətinin rəhbəri bildirib ki, konkret hansısa ölkənin və ya qurumun adı çəkilsə, o istiqamətdə əks qüvvələr işləməyə başlayacaq.

İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.

BMT Təhlükəsizlik Şurasının Dağlıq Qarabağ və ətraf rayonların azad edilməsinə dair qəbul etdiyi dörd qətnaməni Ermənistan bu günə qədər yerinə yetirməyib.

Xəbər lenti

Xəbər lenti