Erməni tərəfinin sərəncamında iki azərbaycanlı hərbi əsir var ki, Yerevan hansısa ilkin şərt olmadan onların Beynəlxalq Qırmız Xaç Komitəsi (BQXK) vasitəsilə qaytarmağa hazırdır.
Trend-in məlumatına görə, etibarlı mənbələrdən "Mediamaks" agentliyinə məlum olub ki, onların Azərbaycan tərəfinə verilməsi yalnız hərbi əsirlərin özlərinin bunu istəmədiyi halda baş tutmaya bilər.
Martın 14-də Ermənistan Müdafiə Nazirliyi bəyan edib ki, martın 5-də Rusiya prezidentinin vasitəçiliyi ilə Azərbaycan və Ermənistan prezidentləri arasında əldə olunan razılaşmaya əməl edərək, azərbaycanlı hərbi əsirlərin qaytarılmasına hazırdır.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.
BMT Təhlükəsizlik Şurasının Dağlıq Qarabağ və ətraf rayonların azad edilməsinə dair qəbul etdiyi dörd qətnaməni Ermənistan bu günə qədər yerinə yetirməyib.