Azərbaycan, Bakı, 20 oktyabr /Trend/
Ermənistan Prezidenti Serj Sarkisyan bildirib ki, ölkəsi daima ATƏT-in Minsk qrupunun həmsədri kimi ABŞ-ın vasitəçilik səylərinə əhəmiyyət verir. Trend-in "Mediamaks"a istinadən verdiyi xəbərə görə, Sarkisyan bunu oktyabrın 19-da ABŞ dövlət katibinin müavini Uilyam Börnsü qəbul edərkən deyib.
Sarkisyan bildirib ki, Ermənistan ABŞ-la münasibətlərinə ölkədə islahatların, iqtisadi inkişafın və regional sabitliyin həyata keçirilməsinin təmin olunması şərti kimi baxır.
Prezident qeyd edib ki, Ermənistan ATƏT-in Minsk qrupunun həmsədri kimi ABŞ-ın Dağlıq Qarabağ münaqişəsinin dinc yolla nizamlanmasına yönəlmiş vasitəçilik səylərinə də əhəmiyyət verir.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.
BMT Təhlükəsizlik Şurasının Dağlıq Qarabağ və ətraf rayonların azad edilməsinə dair qəbul etdiyi dörd qətnaməni Ermənistan bu günə qədər yerinə yetirməyib.