Britaniyalı parlamentari: Dünya ictimaiyyəti məcburi köçkünlərin evlərinə qayıtması üçün səylərini artırmalıdır
Azərbaycan, Bakı, 28 noyabr /Trend, müxbir S.Əhmədova/
Dünya ictimaiyyəti məcburi köçkünlərin evlərinə qayıtması üçün səylərini artırmalıdır. Trend-in məlumatına görə, bunu Böyük Britaniya parlamentinin Leyboristlər Partiyasından olan üzvü Stefan Hepbörn Avropa Azərbaycan Cəmiyyətinin (TEAS) suallarına cavab olaraq bildirib.
S.Hepbörn qeyd edib: "Azərbaycana səfərlərim zamanı həmkarlar ittifaqlarının nümayəndələri ilə görüşlərim olub və onların fəaliyyəti məndə xoş təəssürat yaradıb. Həmçinin, "bp" şirkətinin müxtəlif layihələrində çalışan həm britaniyalı mütəxəssislər, həm də azərbaycanlı fəhlələrlə görüşmüşəm. Lakin mənim üçün ən çətin və təsirli olan Ermənistanla müharibə nəticəsində doğma yurdundan didərgin düşmüş məcburi köçkünlərin məskunlaşdığı düşərgələrə etdiyim səfərlər olub Azərbaycan hökumətinin inşa etdiyi yeni evlərdə məcburi köçkünlərlə görüşmüşəm. Buna rəğmən, dünya ictimaiyyətinin həmin insanların evlərinə qayıtması üçün daha çox iş görməsi vacib məsələlərdən biridir".
Parlamentari bildirib ki, hər səfərində Azərbaycanda baş vermiş dəyişikliklərə heyran qalır:
"BMT-nin müvafiq hesabatlarına əsasən, Azərbaycanda yoxsuluq həddindən aşağıda yaşayan azərbaycanlıların sayı 2000-ci ildə 49 faizdən 2012-ci ildə cəmi 6 faizə düşüb. Hər səfərim zamanı aydın şəkildə görürəm ki, bu inkişaf davam etməkdədir. Bakıda ən çox yadımda qalan o oldu ki, 1966-cı ildə futbol üzrə dünya çempionatında İngiltərəyə qol bağışlayan yan hakim, bildirildiyi kimi, rus deyil, əslində azərbaycanlı Tofiq Bəhramov olub. Biz hər zaman onun həmin gün verdiyi qərara görə minnətdarıq!"
