Qarabağ Azadlıq Təşkilatı "Azərbaycana qarşı Ermənistanın təcavüzü nəticəsində yaranmış Qarabağ məsələsinin həllinə dair Milli Platforma" adlı sənəd hazırlayıb. Trend in məlumatına görə, sentyabrın 25-də Milli Platformanın təqdimat mərasimi keçirilib.
Qarabağ Azadlıq Təşkilatının (QAT) sədri Akif Nağı sənəd barədə məlumat verərək bildirib ki, bu layihə İdarə Heyəti və Ağsaqqallar Şurası tərəfindən bəyənilib və təsdiq edilməsi üçün təşkilatın Ali Məclisinə təqdim olunub. Sentyabrın 24-də Ali Məclisin iclası keçirilib və Milli Platforma təsdiqlənib.
Akif Nağı bildirib ki, Qarabağ məsələsi ilə bağlı bütün içtimaiyyət vahid mövqe bildirməli və bu konsepsiyanı dəstəkləməlidir. Milli Platformanın kəskin ruhda hazırlandığını deyən A.Nağı qeyd edib ki, QAT Azərbaycan torpaqlarının işğaldan yalnız hərbi yolla azad ediləcəyi qənaətindədir. "Biz bu Milli Platformanı bütün ictimai-siyasi qurumlara təqdim edəcəyik və kimin bizə qoşulub-qoşulmayacağını izləyəcəyik. Artıq hər kəs seçim etməlidir ki, vətənpərvər qüvvələrin yanındadır, yoxsa xəyankarların", - A.Nağı vurğulayıb. O qeyd edib ki, dünən Qarabağ Qaziləri Birdliyi QAT-ın platformasına qoşulduğunu bəyan edib.
Qeyd edək ki, Qarabağın erməni işğalçılarından azad olunması üçün ictimai mübarizəni təşkil etmək məqsədilə 28 yanvar 2000-ci ildə Bakıda Qarabağ Azadlıq Təşkilatı yaradılıb. Təsis qurultayında tarix elmləri namizədi, dosent Akif Nağı QAT-ın sədri seçilib. QAT öz sıralarında ölkənin tanınmış ziyalılarını, qaçqın və məcburi köçkünləri, ağsaqqalları, gəncləri, keçmiş döyüşçüləri, ehtiyatda olan yüksək rütbəli zabitləri, həmçinin əhalinin digər sosial təbəqələrinin nümayəndələrini birləşdirir. Hazırda QAT-ın Azərbaycan üzrə rayon, şəhər, çadır düşərgələrində 74 yerli şöbəsi, o cümlədən Türkiyə, İran, Rusiya, İsveç, Almaniya, Fransa, Kanada, Estoniya, İraq və digər ölkələrə təmsilçiləri fəaliyyət göstərir. Təşkilatın 10 min nəfərdən artıq rəsmi üzvü var.
