Noyabrın 9-da Ermənistan XİN başçısı Vardan Oskanyan və Avropa və Avrasiyaya Amerika dəstəyinin əlaqələndiricisi Tomas Adams ümidvar olduqlarını bildiriblər ki, noyabrın 14-də Ermənistan və Azərbaycan XİN başçılarının Brüsseldə keçiriləcək görüşü zamanı Dağlıq Qarabağ münaqişəsinin nizamlanması prosesində "əhəmiyyətli irəliləyiş" əldə olunacaq.
XİN-in mətbuat xidmətindən Mediamaks-a verilən məlumata görə, Vardan Oskanyan və Tomas Adams "Minilliyin Çağırışları" Fondu çərçivəsində proqramların gerçəkləşdirilməsi və Ermənistanın üzərinə götürdüyü öhdəlikləri vaxtında yerinə yetirməsi ilə bağlı məsələləri müzakirə edib.
Tomas Adams 2007-ci ildə keçiriləcək parlament seçkilərinin beynəlxalq standartlara uyğun keçirilməsinin vacibliyini bəyan edərək bildirib ki, ABŞ hökuməti Ermənistanda demokratiyanın möhkəmlənməsinə yardım göstərməkdə davam edəcək.