Azərbaycan, Bakı / Trend müxbir S.İlhamqızı/ Azərbaycanın eks-prezidenti, ASDP-nin lideri Ayaz Mütəllibov ölkəyə qayıtmayacağı təqdirdə gələn il keçiriləcək prezident seçkisində iştirak etməyəcək. Bu barədə bazar ertəsi Trend ə Azərbaycan Sosial Demokrat Partiyasının (ASDP) həmsədri Araz Əlizadə məlumat verib.
"Ayaz Mütəllibov özü bildirib ki, əgər Azərbaycana gəlməsinə imkan yaradılmasa, prezidentliyə namizədliyini irəli sürməyəcək" - deyə Əlizadə bildirib.
Gələn il oktyabrın 15-də Azərbaycanda prezident seçkisi keçiriləcək.
Əlizadənin sözlərinə görə, ASDP prezident seçkisində öz namizədi ilə iştirak edəcək. Lakin partiyanın namizədini ASDP-nin gələn il keçiriləcək qurultayı müəyyənləşdirəcək. Qurultayın isə gələn ilin yaz aylarında keçirilməsi planlaşdırılır.
ASDP sol təmayüllü müxalifət partiyasıdır. Partiyanın həmsədrləri Əlizadə və Mütəllibovdur.
1991-ci ildə Azərbaycan müstəqilliyini elan etdikdən sonra Mütəllibov ilk prezident seçilib. 1992-ci ildə Xalq Cəbhəsi Hərəkatının hakimiyyətə gəlişindən sonra ölkəni tərk edib, o vaxtdan indiyədək Rusiyada mühacirətdə yaşayır.
Eks-prezident Azərbaycanın Baş Prokurorluğunun ittihamı əsasında beynəlxalq axtarışa verilib. Mütəllibov dövlət çevirilişinə cəhd, qanunsuz silahlı dəstələrin yaradılması, zorla hakimiyyəti ələ almaq və digər ağır cinayətlər törətməkdə günahkar bilinir.