Azərbaycan, Bakı, 07 fevral / Trend , müxbir Q.Cəbiyev/ Azərbaycan nümayəndə heyəti bu il ilk dəfə olaraq İsraildə Xocalı faciəsinin növbəti ildönümü ilə bağlı keçiriləcək tədbirə dəvət olunub. Bu barədə cümə axşamı Trend ə Azərbaycan-İsrail Parlamentlərarası Dostluq Qrupunun rəhbəri, millət vəkili Yevda Abramov məlumat verib.
Yaxın Şərq Azərbaycanlıları Konqresi İsraildə ilk dəfə olaraq Xocalı faciəsinin 16-cı ildönümü ilə bağlı fevralın 24-də anım mərasimi keçirəcək. Türkiyənin İsraildəki səfirliyinin dəstəyi ilə keçiriləcək aksiyada iştirakçılara ermənilərin zaman-zaman türklərə və azərbaycanlılara qarşı törətdikləri vəhşiliklərlə bağlı kitablar, materiallar, DVD və CD-lər paylanacaq, erməni terrorunu əks etdirən fotostendlər təşkil olunacaq.
Abramov bildirib ki, tədbirdə iştirak edəcək Azərbaycan nümayəndə heyətinin tərkibi müəyyənləşdirilir. Nümayəndə heyətinin tərkibinə millət vəkilləri, Xarici Ölkələrdə Yaşayan Azərbaycanlılarla İş üzrə Dövlət Komitəsinin və digər dövlət qurumlarının nümayəndələri daxil ediləcək. Tədbir İsrailin ikinci böyük şəhəri olan Hayfada keçiriləcək. Onun sözlərinə görə, növbəti illərdə Xocalı soyqrımı ilə bağlı tədbirlər İsrailin digər şəhərlərində də keçiriləcək.
1992-ci il fevralın 25-dən 26-na keçən gecə Ermənistan Silahlı Qüvvələri keçmiş SSRİ-nin Xankəndidə yerləşən 366-cı motoatıcı alayının şəxsi heyəti və hərbi texnikasının köməyi ilə Xocalı şəhərini işğal edərək Azərbaycan xalqına qarşı misli görünməmiş soyqırım törədib. Bir gecədə 613 nəfər, o cümlədən 63 uşaq, 106 qadın, 70 qoca xüsusi amansızlıqla qətlə yetirilib.
