Azərbaycan, Bakı, 11 fevral / Trend , müxbir R.Hafizoğlu, E.Hüseynov/ İraq Xalq Cəbhəsi partiyası hesab edir ki, İraqda Nuri əl-Malik hökumətinin fəaliyyəti nəticəsində siyasi və sosial-iqtisadi böhran müşahidə olunur ki, bu da dövlətin qeri-fəaliyyətsizliyinə gətirib çıxarıb.
İraq Xalq Cəbhəsi müxalifət partiyası lideri İyad Əllavinin rəyinə görə, İraqda siyasi böhran göz qabağındadır.
"Bu gün hökumətin yarısı və nazirlərin yarısından azı istefaya gedib. İki il bundan öncə hökumət ilə birləşən siyasi partiyaların əksəriyyəti hazırda ondan uzaqlaşıblar və barışmağa ümid yoxdur. Həyat üçün mühüm olan xidmətlər, elektrik enerjisi ilə təminat, su və səhiyyə uçurumun astanasındadır. Ölkədə təhlükəsizlik məsələləri nəzarətsiz səviyyədədir. Hazırda heç kim real olaraq yaranmış vəziyyəti qiymətləndirmək və ondan çıxış yolu tapmaq iqtidarında deyil" - deyə şənbə günü Trend ə elektron poçt ilə müsahibəsində İraqın sabiq baş naziri Əllavi bildirib.
Onun sözlərinə görə, hazırkı İraq hökuməti daxili çəkişmələr içində batır, sektantlıq (dini cərəyanlar arasında mübarizə - red. qeyd), fəaliyyətsizlik, idarəçilikdə səriştəsizlik halları mövcuddur. Hökumət regional problemlərlə üzləşib, korrupsiyanın və dövlət institutlarında vəzifəyə sahib olan hərbçilərin öhdəsindən gələ bilmir. "Bu, İraqın irəliləməsi üçün konkret proqrama malik olmayan fəaliyyətsiz hökumətin yaranmasına gətirib çıxarıb" - deyə Əllavi bildirib.
