Azərbaycan, Bakı, 18 fevral / Trend , müxbir S.İlhamqızı/ Müxalifətçi Azərbaycan Demokrat Partiyası (ADP) prezident seçkisində iştirak barədə qərarını heç bir halda dəyişməyəcək.
"Seçkinin necə keçirilməsindən asılı olmayaraq, biz prezident seçkisində sona qədər iştirak edəcəyik"-deyə ADP sədri Sərdar Cəlaloğlu bazar ertəsi Trend ə açıqlamasında bildirib.
ADP Ali Məclisinin şənbə günü keçirilən sessiyasında builki prezident seçkisində iştirak etmək və partiyanın sədri Cəlaloğlunun prezidentliyə namizədliyinin irəli sürülməsinə dair qərar çıxarılıb.
ADP Ali Məclisinin üzvü, Cəlaloğlunun qardaşı Qurban Məmmədov isə toplantıda bildirib ki, prezident seçkisində saxtakarlıqlara yol verildiyi əvvəldən bəlli olarsa, partiyanın seçkidə iştirakının əleyhinə olacaq. Məmmədov hesab edir ki, ADP özünün seçki kampaniyasını müəyyən bir mərhələyə qədər aparmalı, seçki prosesində saxtakarlıqlar müşahidə edərsə, seçkini boykot etməlidir: "Biz yalançı seçkidə dekorasiya olmamalıyıq. Əgər seçkiyə az bir müddət qalmış görsək ki, seçkinin taleyi artıq həll olunub və nəticə bəllidir, onda mütləq boykot qərarı verməliyik. Çünki belə seçki və orada iştirak bizə lazım deyil"-deyə ADP-nin Məclis üzvü bildirib.
Cəlaloğlu bildirib ki, seçkinin hansısa mərhələsində geri çəkilmək, seçkini boykot etmək fikri yoxdur. Onun sözlərinə görə, partiyada hamı ümumi qərara tabe olmalı və onun əleyhinə çıxmamalıdır: "Partiyada yekun qərar çıxarılana qədər hamı öz fərqli fikrini söyləyə bilər, lakin Məclis qərar qəbul etdikdən sonra buna qarşı çıxmaq, icra etməmək artıq partiyada hərc-mərclik yarada bilər. Partiyada heç kimin əlahiddə səlahiyyəti, qərarları dəyişmək funksiyası yoxdur və hamı partiyanın yekun qərarına riayət etməlidir"-deyə Cəlaloğlu bildirib.
Sağ təmayüllü partiya olan ADP 1991-ci ildə Cəlaloğlu tərəfindən təsis edilib. Partiya 2007-ci ilin yanvarınadək iqtidara qarşı radikal müxalif mövqedə olub. Ötən ilin yanvarında ADP-nin hakimiyyətlə dialoq qurulması ilə bağlı yeni siyasi kursu qəbul edilib.
Müxalifət düşərgəsindən yalnız üç partiyanın təmsil olunduğu "Azadlıq" bloku əlverişli seçki şəraiti yaradılmayacağı təqdirdə prezident seçkisini boykot edəcəyini açıqlayıb. Müsavat, Ümid, Böyük Quruluş partiyaları isə seçkidə öz namizədi ilə iştirak edəcəyini bildirib.