Azərbaycan, Bakı 21 fevral / Trend , müxbir K. Zərbalıyeva/ Ömürlük azadlıqdan məhrum edilmiş məhkumların saxlanma şəraitinin yaxşılaşdırılması ilə bağlı qanunvericiliyə dəyişikliklər ediləcək.
Bu barədə Trend ə cümə axşamı Ədliyyə Nazirliyinin İdarə rəisi Faiq Qurbanov məlumat verib.
Avropa Şurasının İnsan Hüquqları üzrə Komissarı Tomas Hammarberq çərşənbə günü Azərbaycanda insan hüquqlarının ümumi vəziyyəti ilə bağlı hesabatını açıqlayıb və həmin sənəddə uzun müddətə, xususilə də ömürlük həbs cəzası ilə həbs olunan məhbusların saxlanıldığı şəraitdən narahatlıq bildirilir.
Bunu nəzərə alaraq AŞ komissarı ömürlük və uzun müddətli həbs cəzasına məhkum olunanların təcridetmə və izolyasiyasının qarşısını almaq üçün, effektiv qərarların qəbul edilməsini və bir sıra digər tövsiyələrini bildirib.
İdarə rəisi deyib ki, yeni Qanun qüvvəyə minəndən sonra, ömürlük azadlıqdan məhrum edilmiş məhkumların vəziyyəti xeyli yaxşılaşacaq. Nazirlik rəsmisinin sözlərinə görə, bu qəbildən olan məhkumlar üçün yeni həbsxana tikilib istifadəyə veriləndən sonra, onların saxlanma şəraiti ilə bağlı problemlərinin böyük əksəriyyəti həll olunacaq.
Penitensiar Xidmətin İctimaiyyətlə Əlaqələr Mərkəzinin rəhbəri Mehman Sadıqov bildirib ki, ömürlüklərin və uzun müddətli həbs cəzasına məhkum olunmuş məhkumların saxlanma şəraitinin yaxşılaşdırılması ilə bağlı təkliflər aidiyyati qurumlara göndərilib və həmin təkliflər baxılma mərhələsindədir.
Sadıqovun sözlərinə görə, qanunvericiliyə təklif olunan dəyişikliklər ömürlüklərə ailələri ilə verilən görüşlərinin, telefon danişıqlarının, sovqatlarının sayının artırılması, televiziya verilişlərinə baxmaq imkanının, onların ali təhsil almaq hüquqlarının təmin olunması üçün şəraitin yaradılması ilə bağlıdır.
PX rəsmisi bildirib ki, ömürlüklərin ali təhsil almaq hüququnun təmin edilməsi həm də Təhsil Nazirliyindən asılı olan məsələdir. "Bunun üçün Təhsil Nazirliyi ilə Penitensiar Xidmət arasında razılaşma olmalıdır",-deyə Sadıqov bildirib.
Ədliyyə naziri yanında İctimai Komitənin üzvü, hüquq müdafiəçisi Çingiz Qənizadə bildirib ki, ömürlüklərin saxlanma şəraiti ilə bağlı problemləri yeni həbsxana inşa edilib istifadəyə veriləndən sonra həllini tapacaq. Qənizadə hesab edir ki, yeni həbsxana istifadəyə verilənədək qanunvericiliyə də müvafiq dəyişikliklər ediləcək.
Qənizadə ömürlüklərlə bağlı əsas problemin ölüm cəzası ömürlüklə əvəzlənmiş məhkumların cəzalarının 15 ilə endirilməsi ilə bağlı olduğunu deyir. Hüquq müdafiəçisi bildirib ki, bu problem insan hüquqları sahəsində fəaliyyət göstərən beynəlxalq təşkilatlarla da müzakirə olunur.
Ötən ilin sonlartında ədliyyə nazirinin müavini, Penitensiar Xidmətin rəisi Nazim Ələkbərov jurnalistlərə açıqlamasında bildirib ki, təklif olunan dəyişikliklərdən biri də "ömürlük"lərin yazışmalarında senzuranın aradan qaldırılması ilə bağlıdır.
İdarə rəisi bildirib ki, hazırda inşasına başlanılmış yeni həbsxana istifadəyə veriləndən sonra ömürlük azadlıqdan məhrum edilmiş məhkumların saxlanma şəraitləri ilə bağlı problemlərinin əksəriyyəti həll olunacaq. Yeni həbsxanada məhkumların işləməsi, onların günün istənilən vaxtında açıq havada gəzintiyə çıxması üçün şərait yaradılacaq. Yeni həbsxananın tikintisi zamanı Türkiyə, Finlandiya və Estoniyanın həbsxanalarındakı model tətbiq olunacaq.
Azərbaycanda 200-dən artıq ömürlük azadlıqdan məhrum edilmiş məhkum var. Onlar Qobustan həbsxanasında kamera reyimində saxlanılırlar. Bu məhbuslara gün ərzində 1 saat açıq havada gəzintiyə icazə verilir.
Həbsxana Qobustan Dövlət Qoruğunun ərazisində yerləşdiyindən, onun bu ərazidən köçürülməsinə qərar verilib. Qobustan həbsxanasının əvəzinə, Bakı şəhərinə daha yaxın ərazidə, Umbakı qəsəbəsi yaxınlığında yeni həbsxananın inşasına başlanılıb. Yeni həbsxanada "ömürlüklər" üçün xüsusi korpus inşa olunacaq.