Azərbaycan, Bakı, 05 mart / Trend , müxbir S.İlhamqızı/ Dünya Azərbaycanlıları Konqresinin daxilində növbəti dəfə ziddiyyət yaranıb. Qurumun Azərbaycan nümayəndəliyindən Trend ə verilən məlumata görə, martın 4-də DAK İdarə Heyətinin toplantısı (paltak iclası) keçirilib, 11 nəfər üzvün iştirakı ilə baş tutan iclasda Sabir Rüstəmxanlı sədr seçilib.
DAK-ın İdarə Heyətinin 17 nəfər üzvü var. Həmin toplantıda İdarə Heyətinin 11 nəfər üzvünün - Sabir Rüstəmxanlı, Adil Minbaşı, Səməd Fərtaş, Mirəşrəf Fətiyev, Abuzər Bağırov, Fəramərz Quluzadə, Eldar Qaradağlı, Cavad Derəxti, Məmməd Azər, Haide Bornak və Rəhmət Nəcəfpurun iştirak etdiyi bildirilib. İclasda DAK İdarə Heyətinin üzvü Rüstəmxanlının yekdilliklə DAK İdarə Heyətinin yeni sədri seçilməsi barədə qərar çıxarılıb.
Toplantıda DAK-ın sədri Qulamrza Səbri Təbrizi iştirak etməyib.
DAK-ın katibi Eliza İsmayılova Trend ə açıqlamasında bildirib ki, bu məlumatlar yalandır və belə bir toplantı olmayıb. Onun sözlərinə görə, adları çəkilən 11 nəfərin hamısı bir-birinə qarşıdırlar: "Onların bir mövqeyi var - DAK-ın iyunda keçirilməsi nəzərdə tutulan birlik qurultayı baş tutmasın. Çünki onlar öz şəxsi maraqlarına görə DAK-ın bütövləşməsini, birliyini istəmirlər"-deyə İsmayılova bildirib.
Onun sözlərinə görə, DAK-ın sədri Təbrizi də sözügedən toplantını qeyri-qanuni hesab edir. İsmayılovanın dediyinə görə, Təbrizi Rüstəmxanlı ilə danışıb və Rüstəmxanlı bildirib ki, DAK-ın sədri olmaq fikrində deyil, bu qərar onun iradəsindən kənar şəkildə çıxarılıb.
Mövzu ilə bağlı Rüstəmxanlının fikirlərini öyrənmək mümkün olmayıb.
DAK 2003-cü ildə iki yerə parçalanmışdı. Həmin tərəflərin yenidən birləşməsi məqsədilə iyunun 20-22-də Brüssel şəhərində növbədənkənar birlik qurultayının keçirilməsi planlaşdırılır.
Keçmiş sədr Cavad Derəxti və bir neçə nəfər tərəfdarları Qulamrza Təbriziyə qarşı müxalif mövqedədirlər.
