Azərbaycan, Bakı, 06 mart / Trend , müxbir S.İlhamqızı, C.Babayeva / Azərbaycan Yolu Siyasi Hərəkatının (AYSH) sədri İlqar Qasımovun adından mətbuata bəyanat yayılıb. Trend ə daxil olan həmin bəyanatda bildirilir ki, Qasımov özünə qarşı təzyiqlərə etiraz əlaməti olaraq siyasi fəaliyyətini dayandırmağa qərar verib.
"Mənə qarşı bütün növ təzyiqlərə baxmadan, mən və AYSH öz fəaliyyətini davam etdirməyə qərarlı idik. Lakin son hadisə, mənim Azərbaycan vətəndaşlığına qəbul edilməməyim və qardaş Rusiyadakı dostlarımın mənə qarşı fəaliyyəti qərarımın dəyişməsinə səbəb oldu"-deyə Qasımovun adından yayılan bəyanatda bildirilir.
Azərbaycan Yolu Siyasi Hərəkatının sədri Qasımov məsələ ilə bağlı Trend ə açıqlama verib. Bildirib ki, bu bəyanat saxtadır və ona qarşı hazırlanmış bir təxribatdır. Qasımovun fikrincə, saxta bəyanatın yayılması həm iqtidarda, həm də müxalifətdə təmsil olunan bəzi qüvvələrin onun fəaliyyətindən narahatlığından irəli gəlir: "Bəyan edirəm ki, nə mən, nə də Azərbaycan Yolu Siyasi Hərəkatı fəaliyyətini dayandırmayıb, əksinə, Hərəkat seçkiöncəsi siyasi fəaliyyətini daha da gücləndirəcək"-deyə Qasımov bildirib.
Onun fikrincə, müxalifət partiyalarının bölgələrdəki rayon təşkilatlarının Azərbaycan Yolu Siyasi Hrəəkatına keçməsi həmin partiyaların narahatlığına səbəb olub və ona qarşı belə təxribata əl atılıb. Qasımov deyib ki, məsələnin araşdırılması üçün bu gün hüquq-mühafizə orqanlarına müraciət edəcək.
Azərbaycan Yolu Siyasi Hərəkatının sədr müavini Şəmsəddin Rəhimli də Trend ə açıqlamasında bildirib ki, qurumun mətbuat xidməti və şəxsən Qasımov belə bir bəyanat yaymayıb: "Kimsə İlqar Qasımovun adına elektron poçt açıb və belə bir bəyanat yayıb. Bunun İlqar Qasımova və Azərbaycan Yolu Siyasi Hərəkatına heç bir aidiyyatı yoxdur"-deyə Rəhimli bildirib.
Rəhimli qeyd edib ki, Qasımovun adından bəyanat yayan şəxsin kimliyi onlara məlum deyil. Amma o hesab edir ki, həmin naməlum şəxs Qasımovun siyasi fəaliyyətindən ciddi narahatlıq keçirir və məhz prezident seçkisi öncəsi belə bir təxribata əl atıb.
Qeyd edək ki, saxta bəyanat KİV-ə [email protected] elektron ünvanından göndərilib.