Müxalifət partiyasının qurultayı təxirə salınıb

Azərbaycan, Bakı, 16 aprel / Trend , müxbir S.İlhamqızı/ Azərbaycan Sosial Demokrat Partiyasının (ASDP) may ayına planlaşdırılan qurultayı təxirə salınıb.

"Rayon təşkilatlarının konfranslarını maya qədər başa çatdırmaq mümkün olmayacaq, ona görə də qurultay təxirə salınır"-deyə ASDP-nin həmsədri Araz Əlizadə çərşənbə günü Trend a açıqlamasında bildirib.

Onun sözlərinə görə, may ayından ASDP-nin rayon təşkilatlarının konfransları başlanacaq. Qurultay isə yay aylarında keçirilə bilər.

"Prezident seçkisinə qədər qurultay keçiriləcək"-deyən Əlizadə əlavə edib ki, bu ilin oktyabrında keçiriləcək prezident seçkisi ilə bağlı ASDP-nin qərarı Mərkəzi Komitənin Plenumunda da çıxarıla bilər.

Əlizadə bildirib ki, Mərkəzi Komitə prezidentliyə kimin namizədliyini irəli sürsə, həmin şəxs də bu qərarı icra edəcək və ASDP-nin namizədi olacaq.

ASDP sol təmayüllü müxalifət partiyasıdır. Partiyanın həmsədri Əlizadə, digər həmsədri isə Azərbaycanın eks-prezidenti, hazırda mühacirətdə yaşayan Ayaz Mütəllibovdur.

1991-ci ildə Azərbaycan müstəqilliyini elan etdikdən sonra Mütəllibov ilk prezident seçilib. 1992-ci ildə Xalq Cəbhəsi Hərəkatının hakimiyyətə gəlişindən sonra ölkəni tərk edib, o vaxtdan indiyədək Rusiyada mühacirətdə yaşayır.

Müəlliflə əlaqə saxlamaq üçün elektron ünvan - [email protected]