Gürcüstan, Tbilisi, 10 may / Trend , müxbir E. Rüstəmov/ Rusiya münaqişənin nizamlanmasına yardım edən tərəf deyil, bu dövlət münaqişənin inkişaf etməsinə imkan yaradır. Bu barədə Trend a Gürcüstanın reinteqrasiya üzrə dövlət naziri Temur Yakobaşvili bildirib.
"Bu gün Rusiya, Gürcüstandan başlayaraq, Şərqi Avropanın sərhədlərini dəyişdirməyə can atır. Təbii ki, bu, avropalıları, Apropa təşkilatlarını, istər Avropa İttifaqını,istərsə də, digər təşkilatları narahat etməyə bilməz. Bu mərhələdə Avropa artıq öz sözünü deməlidir",- deyə nazir cümə günü bildirib.
Nazir, hər şeydən əvvəl, Gürcüstanın müharibədən qaçmalı olduğunu hesab edir. İkincisi, osetinlər və abxazlarla danışıqların formatına yenidən baxmalıdır. Çünki heç kəs Rusiyanın münaqişə tərəfi olmasına şübhə etmir. Üçüncüsü, Rusiya sülhməramlılarını polislərlə əvəzləmək lazımdır. Nazirin fikrincə, Gürcüstan Rusiya sülhməramlılarını öz ərazilərindən hətta MDB tərkibindən çıxmadan da çıxara bilər.
"Hazırda Gürcüstanı müharibəyə təhrik etmək üçün səylər göstərilir, lakin biz buna getməyəcəyik. Biz məsələni sülh yolu ilə həll etmək üçün hər şey etməliyik", - deyə o əlavə edib.
