Azərbaycan, Bakı, 12 may / Trend , müxbir C.Babayeva/ Azərbaycan ziyalıları Bakıda "İsrail-Azərbaycan dostluq parkı"nın açılışına etiraz edirlər. Bu barədə bazar ertəsi Azərbaycan Ziyalıları Birliyinin sədri Eldəniz Quliyev bildirib.
"İsrailin BMT Baş Assambleyasında mart ayında qəbul edilən "Azərbaycanın işğal olunmuş ərazilərində vəziyyət haqqında" Qətnaməyə bitərəf qalması, İsrail Parlamentində qondarma "erməni soyqırımı"nı müzakirəyə çıxarması cəhdləri dostulq parkının açılışını mümkünsüz edir", deyə Quliyev bildirib.
İsrailin Müstəqillik Günü ilə əlaqədar mayın 8-nə təyin olunmuş "İsrail-Azərbaycan dostluq parkı"nın açılışı təxirə salınıb.
Qarabağ Azadlıq Təşkilatı mayın 8-də Şuşanın işğalının ildönümü günü belə bir tədbirin keçirilməsinə etiraz edərək, bununla əlaqədar Azərbaycan Xarici İşlər Nazirliyinə, İsrail səfirliyinə ünvanladığı müraciətində bu mərasimin yolverilməz olduğunu bildirib.
Azərbaycan Ziyalıları Birliyi sədrinin sözlərinə görə, ziyalılar tarixindən asılı olmayaraq "İsrail-Azərbaycan dostluq parkı"nın açılışına birmənalı şəkildə etiraz edirlər və Birlik bununla bağlı bəyanat qəbul edib.
Onun sözlərinə görə, "İsrail-Azərbaycan dostluq parkı"nın açılışına qarşı ictimai müqavimət güclənməkdədir.
"İsrail-Azərbaycan dostluq parkı"nın açılışına Qarabağ Azadlıq Təşkilatı, Azərbaycanın İslam Partiyası, Azərbaycan Ziyalıları Birliyi, Dini Etiqad və Vicdan Azadlığının Müdafiəsi Mərkəzi etiraz edir.
İsrailin Azərbaycandakı səfiri Artur Lenkin bazar ertəsi Trend -a bildirdiyinə görə, dostluq parkının açılış gününün vaxtı hələ müəyyənləşdirilməyib. Parkın İsrailin kənd təsərrufatı nazirinin bu həftə Azərbaycana nəzərdə tutulan səfəri çərçivəsində açılışı gözlənilir.
Məqalə müəllifi ilə əlaqə saxlamaq üçün ünvan - [email protected]