Azərbaycan, Bakı, 21 may / Trend , müxbir K.Zərbalıyeva/ Azərbaycanın Yevlax rayon sakininin həyətyanı sahəsində çəkisi 120 kiloqram olan çox sayda çətənə kolu tapılıb.
DİN-in mətbuat xidmətinin çərşənbə günü yaydığı məlumatda bildirilir ki, rayon polis şöbəsinin gömrük idarəsi əməkdaşları tərəfindən Malbinəsi kənd sakini Məhbubə Hacıyevanın həyətyanı sahəsindən yabanı halda bitmiş 1202 ədəd çətənə kolu yığılaraq məhv edilib.
Bu ilin birinci rübündə respublikada narkotik vasitələrin və psixotrop maddələrin qanunsuz dövriyyəsi ilə bağlı cinayətlər 11,9, o cümlədən narkotikləri satışı və ya satış məqsədilə istehsalı halları 27,2 faiz artıb.
Daxili işlər orqanları tərəfindən hesabat dövründə qanunsuz dövriyyədən 181 kiloqramdan artıq narkotik vasitə götürülüb, 41,5 kq-a yaxın narkotik vasitənin qaçaqmalçılıq yolu ilə respublikaya gətirilməsinin qarşısı alınıb.
Narkotiklərlə bağlı cinayətlərə görə məsuliyyətə cəlb olunmuş 400 nəfərdən 367-i əmək qabiliyyətli işləməyən və oxumayan, 101-i əvvəllər cinayət törətmiş şəxs, 7-i qadın, 1-i yetkinlik yaşına çatmayandır.
Məqalə müəllifi ilə əlaqə ünvanı: [email protected]