Azərbaycan, Bakı, 30 may/ Trend , müxbir E.Babayev/ Azərbaycanın hakim Yeni Azərbaycan Partiyası (YAP) bəyan edib ki, Azərbaycanda seçkiləri boykot etməyin hüquqi mexanizmi olmadığından, müxalifətin bu addımı səmərəsiz olacaq. "Qərb ölkələrinin bir çoxunda, xüsusilə ABŞ-da olduğu kimi, Azərbaycanda da vətəndaşların seçkidə iştirakı onun vətəndaşlıq borcu sayılır, yəni, inzibati və ya məcburi qaydada vətəndaşın seçkiyə gətirilməsi və iştirakı kimi qanunda birbaşa göstəriş yer almır. Azərbaycanda seçkilərdə yetərsay anlayışı da yoxdur və bu baxımdan müxalifət nümayəndələrinin boykot çağırışları yersizdir", - deyə cümə günü Trend -a YAP icra katibinin müavini, millət vəkili Mübariz Qurbanlı bildirib.
Trend -un arayışı: Azərbaycanda prezident seçkiləri oktyabrın 15-də keçiriləcək. Mayın 29-da üç müxalifət partiyasının (Xalq Cəbhəsi, Liberal, Vətəndaş və İnkişaf) təmsil olunduğu "Azadlıq" bloku boykot qərarını rəsmiləşdirib. Blok xüsusən Seçki Məcəlləsinə əlavə və dəyişikliklər zamanı seçki komissiyalarının pariet əsasda formalaşması təklifinin nəzərə alınmamasına etiraz edib. Eyni zamanda, blok dəyişikliklər sırasında namizədlər üçün depozitin 300 min manata qaldırılmasının, dövlət KİV-də namizədlərə ayrılan pulsuz təbliğatın ləğv olunmasının, namizədlərin qeydiyyatının ləğvinin sadələşdirilməsinin müxalifətin imkanlarını məhdudlaşdırmağa xidmət etdiyi qənaətindədir. Müsavat Partityasının başqanı İsa Qəmbərin, ADP sədri Sərdar Cəlaloğlunun, Yaşıllar Partiyasının sədri Mais Güləliyevin namizədliyi təmsil olunduqları partiyalar tərəfindən irəli sürülüb. Bundan başqa, Azərbaycan Naminə İctimai Forumun rəhbəri Eldar Namazov müstəqil şəkildə namizədliyini irəli sürüb. Hakim Yeni Azərbaycan Partiyası isə, hazırki dövlət başçısı İlham Əliyevin namizədliyini irəli sürmək niyyətindədir.
Qurbanlı vurğulayıb ki, xalqın vətəndaşlıq borcunu yüksək səviyyədə yerinə yetirərək, kütləvi şəkildə seçkidə iştirak edəcəyinə əmindirlər. "Bu gün müxalifətin elektron KİV-dən, dövri mətbuatdan, parlament tribunasından tam bərabər şəkildə istifadə etmək imkanı var. Bəzən müxalifətin dövri mətbuatda istifadə etdiyi qəzet səhifələrinin həcmi iqtidarın istifadə etdiyindən də çoxdur. Müxalifət seçkiöncəsi şəraitlə bağlı əsassız iddialar irəli sürür. Bu gün hər bir partiyanın, siyasi qüvvənin seçkiyə qatılmaq imkanı var. Sadəcə, müxalifət dairələrinin bir qismi - xüsusilə radikal qanada məxsus olanlar belə iddialarla öz məğlubiyyətlərini kölgələmək istəyirlər. Onların seçkiləri boykot haqqında söylədikləri beşiyindəcə boğulan bir tezisdir. Bu fikir inkişaf, dəstək tapacaq bir tezis deyil. Boykot vətəndaşların hakimiyyətdən tam narazı olduğu halda yaşanır. Azərbaycanda isə, hakimiyyətin siyasəti xalqın 90 faizdən çoxu tərəfindən müdafəi edilir" - deyə Qurbanlı bildirib.
YAP 1992-ci ildə o vaxt Naxçıvan Ali Məclisinin sədri olan Heydər Əliyev tərəfindən yaradılıb. Azərbaycanda 14 ildən artıqdır hakim partiya olan YAP-ın indiki sədri prezident İlham Əliyevdir
Məqalə müəllifi ilə əlaqə ünvanı: [email protected]
