Azərbaycan, Bakı, 02 iyun / Trend , müxbir E.Babayev/ Azərbaycanın müxalif Müsavat Partiyası seçkidə iştirak qərarını dəyişə bilər. "Müsavat Partiyasının bu gün keçirilən iclasında seçkidə iştirak edib-etməmək məsələsi müzakirəyə çıxarılıb və qərara gəlinib ki, partiyanın ayrı-ayrı strukturlarında bu məsələ ətraflı araşdırılsın, yekun qərar verilsin" -bazar ertəsi Trend -a Müsavatın Mərkəzi İcra Apartının rəhbəri Arif Hacılı məlumat verib.
Trend -un arayışı: Parlament bazar ertəsi Seçki Məcəlləsinə əlavə və dəyişiklikləri qəbul edib. Yeni layihəyə görə, prezidentliyə namizədlərin depozit qoyma şərti götürülür. Namizədlər yalnız imza toplayacaqlar. Namizədliyin qeydə alınması üçün tələb olunan 45 min imzanın 40 minə endirilməsi nəzərdə tutulur. Bundan əlavə, seçki təbliğatı 120 gündən 75 günə endirilir. Məcəllədə dövlət televiziyasında namizədlərə pulsuz efir vaxtı ayrılması qadağan edilib.
Hacılı deyib ki, Azərbaycan hakimiyyətinin addımları müxalifəti seçkidə iştirak etməməyə sövq edir. Dəyişikliklər hakimiyyətin nəinki demokratik seçkilər keçirməkdə, ümumiyyətlə, normal seçki kampaniyasının aparılmasında maraqlı olmadığını göstərir. "Şərait daha da pisləşib. Bizim seçkidə iştirakımızla bağlı Məclisimizin qərarında göstərilmişdi ki, qərara yenidən baxılması mümkündür. İndi seçki ilə bağlı birinci mərhələ, demək olar ki, başa çatıb. Hakimiyyətin demokratik seçki keçirmək niyyətində olmadığı göz önundədir və bu səbəbdən, biz seçki ilə bağlı qərarımıza yenidən baxmağı düşünürük" -deyə Hacılı vurğulayıb.
Müxalifəti təmsil edən Müsavat Partiyası 1992-ci ildə yaradılıb. Partiyanın başqanı İsa Qəmbər Azərbaycan parlamentinin eks-spikeri (1992-93-cü illərdə) və 2003-cü ildə keçirilmiş prezident seçkisində prezidentliyə namizəd olub. Partiya beş nəfər deputatla parlamentdə təmsil olunur.
Məqalə müəllifi ilə əlaqə ünvanı: [email protected]
