...

Azərbaycanın müxalifət lideri Seçki Məcəlləsinə dəyişikliklərdən narazıdır

Siyasət Materials 2 İyun 2008 18:26 (UTC +04:00)

Azərbaycan, Bakı, 02 iyun/ Trend , müxbir İ.Əlizadə/ Azərbaycan müxalifətini təmsil edən Xalq Cəbhəsi Partiyasının sədri hesab edir ki, Seçki Məcəlləsinə edilən əlavə və dəyişikliklər prezidentliyə namizədlərin qeydiyyata alınmasını daha da çətinləşdirəcək. "Təəssüflər olsun ki, Seçki Məcəlləsinə Azərbaycan cəmiyyətinin və dünya ictimaiyətinin gözlədiyi dəyişiklik edilmədi", - deyə bazar ertəsi Trend -a açıqlamasında Azərbaycan Xalq Cəbhəsi Partiyasının (AXCP) sədri, "Azadlıq" blokunun həmsədri Əli Kərimli bildirib.

Parlamentin bazar ertəsi keçirilən iclasında Seçki Məcəlləsinə əlavə və dəyişikliklər layihəsi qəbul olunub. Dəyişikliyə əsasən, seçki kampaniyası müddətinin dörd aydan 75 günə endirilib, namizədlərin pul depoziti hesabına qeydiyata alınması ləğv edilib, namizədlərin qeydiyyata alınması üçün tələb olunan imzalar 45 mindən 40 minə endirilib, dövlətdən maliyyələşən televiziya (AzTV), radio və qəzetlərdə namizdlərin pullu və pulsuz təbliğat aparması qadağan olunub, prezidentliyə namizədlərin seçki fondu bir milyon manatdan on milyon manata qədər artırılıb, hərbi hissələrdə seçki məntəqələrinin yaradılması ləğv edilib.

Parlament ,100 deputat lehinə, 3 əleyhinə və 1 bitərəf qalmaqla, Seçki Məcəlləsinə əlavə və dəyişikliklər layihəsini qəbul edib.

Seçki Məcəlləsinin təkmilləşdirilməsi üçün Azərbaycan hökuməti ilə Avropa Şurasının Venesiya Komissiyasının birgə müzakirələri nəticəsində yeni layihə hazırlanıb. Azərbaycan hökumətinin hazırladığı əlavə və dəyişikliklər layihəsinə Avropa Şurası Venesiya Komissiyası rəy verib.

"Seçki Məcəlləsinə edilən dəyişikliklər indiyədək mövcud olan qanunvericiliyi daha da qeyri-demokratikləşdirib", - deyə Kərimli əlavə edib.

AXCP sədri qeyd edib ki, Seçki Məcəlləsinə edilən dəyişiklik, əsasən, seçki komissiyalarının tərkibinin dəyişdirilməsinə, şikayətlərə baxılma qaydalarına, seçki təbliğatının bərabər şəkildə təşkil olunmasına, KİV-dən seçki kampaniyasında istifadə olunmasına, hərbçilərin səsverməsinin təşkil edilməsinə aid olmalı idi.

"Əgər əvvəllər namizədlərin topladıqları imzalar saxta hesab olunardısa, pul depoziti hesabına qeydiyyata alına bilərdilər. İndi isə, namizədlər bu imkandan məhrum olublar", - deyə Kərimli əlavə edib.

AXCP sədri dövlət televiziyasında namizədlərin təbliğatının qadağan olunmasını, seçki komissiyalarının yenidən təşkili məsələsində heç bir dəyişikliyin olmamasını da neqativ hal kimi qiymətləndirib: "Ən neqativ dəyişikliklərdən biri də təşviqat vasitələrinin açıq yerlərdə, küçə və meydanlarda yerləşdirilməsinə qoyulan qadağalardır".

Hakim Yeni Azərbaycan Partiyası (YAP) Siyasi Şurasının üzvü, parlamentin Aqrar məsələlər daimi komissiyasının sədri Eldar İbrahimov isə bildirib ki, Seçki Məcəlləsinə edilən əlavə və dəyişkliklər prezident seçkilərinin azad və demokratik keçirilməsini təmin edəcək: "Məcəlləyə edilən əlavə və dəyişikliklər Azərbaycan hakimiyyətinin seçkilərin azad və demokratik şəkildə keçirilməsində maraqlı olduğunu göstərdi".

Hakim partiya nümayəndəsi hesab edir ki, Əli Kərimli və digər müxalifət liderləri prezident seçkilərində məğlub olacaqlarını bilirlər: "Ona görə də, hakimiyyətə böhtan atmaqla məşğul olurlar. Əli Kərimli və digər müxalifət liderlərinin gücləri varsa, seçkiyə qatılsınlar. Bütün dünya bilir ki, prezident İlham Əliyev gördüyü işlərlə xalqın etimadını qazanıb və payızda keçiriləcək prezident seçkisi də bunu təsdiq edəcək".

Məqalə müəllifi ilə əlaqə ünvanı: [email protected]

Xəbər lenti

Xəbər lenti