Gürcüstan, Tbilisi, 05 iyun/ Trend , müxbir N.Kirtsxaliya, R.Ağayev/ Rusiyanın Abxaziyadakı dəmir yolunu təmir etməsi Gürcüstanın suverenliyinə təhlükə yaradır. Rusiya tərəfi isə, əmindir ki, bunu abxazların sosial-iqtisadi həyatının yaxşılaşdırılması üçün edir.
Rəsmi Tbilisi ötən şənbə dəmir yolunun bərpası üçün Rusiyanın Abxaziyaya Rusiya Müdafiə Nazirliy Dəmir Yolu Qoşunlarının 200 hərbi qulluqçusunu göndərməsi ilə bağlı kəskin etirazını bildirib. Gürcüstan dəmir yolu qoşunlarının Abxaziyaya daxil olmasınıtəcavüz aktı və müdaxiləyə hazırlıq adlandırıb.
Gürcüstanın reinteqrasiya məsələləri üzrə dövlət naziri Teymuraz Yakobaşvili çərşənbə günü jurnalistlərə bildirib ki, Gürcüstan Rusiyanın hərbi bölmələrinin Abxaziyaya daxil edilməsinə razılıq verməyib. "Abxaziyada reabilitasiya işlərinin aparılması üçün Rusiyanın silahlı bölmələrinin buraya daxil edilməsinə Gürcüstanın razılığını təsdiqləyən heç bir sənəd yoxdur", - dövlət naziri çərşənbə günü bildirib. Onun sözlərinə görə, Rusiya tərəfinin bu hərəkətlərin Gürcüstanla razılaşdırıldığına dair iddiaları ya "qəsdən söylənilən yalan, ya da düşünülməmiş hərəkətlərə haqq qazandırmaq üçün edilən cəhdlərdir", - Yakobaşvili bildirib.
Gürcüstanın hərbi eksperti Giya Xuxaşvili hesab edir ki, hazırki mərhələdə Abxaziyada dəmir yolunun bərpası kifayət qədər uzaq perspektivdir və bunun əsas səbəbi Gürcüstan-Abxaziya münaqişəsinin nizamlanmasıdır. "Sadəcə, hələ dəmir yolu əlaqəsinin bərpa olunacağı təqdirdə, yüklərə gömrük nəzarətinin harada - İnquri və ya Psouda keçiriləcəyi, möhürlənmiş yüklərin və s. necə yoxlanılacağı hələ müəyyən edilməyib, - ekspert cümə axşamı Trend -a bildirib.
Bununla yanaşı, Xuxaşvili qeyd edir ki, Azərbaycan yolun bu sahəsinin bərpa olunmasını bəyənməyə bilər, belə ki, bu blokadada olan Ermənistanın maraqlarına xidmət edir. Buna baxmayaraq, "Azərbaycanın narazılığı iddia şəklini ala bilməz". Bundan əlavə, dəmir yolunun bu sahəsinin Bakı-Tbilisi-Qars dəmir yolu magistralına nə dərəcədə rəqabət göstərə biləcəyi faktını da nəzərə almaq lazımdır.
"Yüklərin axması baş verəcək ki, bu da magistralın tikintisi haqqında sazişə nail olmuş və öz vaxtında layihəni sənədləşdirmiş konsorsiumun iqtisadi hesablamalarında öz əksini tapmayıb", - ekspert qeyd edib.
"RF-nin dəmir yolu qoşunlarının Abxaziyaya daxil edilməsi hər hansı bir şəkildə beynəlxalq hüquqa zidd ola biləcək akt deyil", - RF Dövlət Dumasının deputatı Andrey Klimov hesab edir.
O hesab edir ki, hazırda Abxaziya ərazisində dağıdılmış dəmir yolu hissəsinin olması, ilk növbədə, orada yaşayan vətəndaşlar üçün pisdir. "Bu işə qabaqcadan düşünülməmiş şəkildə baxsaq, məlum olur ki, Rusiya öz pullarına onların dəmir yolunu bərpa edir və bunun üçün heç bir pul götürmür, heç bir kompensasiya tələb etmir", - RF Dövlət Dumasının Beynəlxalq İşlər üzrə Komitəsinin sədr müavini cümə axşamı Trend -a bildirib.
O əmindir ki, Rusiya Abxaziyada həyat üçün normal şərait yaradır və bunu başqa üsullarla etmək mümkün deyil. "Biz bazar iqtisadiyyatı şəraitində yaşayırıq və hansısa firmanın öz pulları hesabına dəmir yolu infrastrukturunu bərpa etməyə başlayacağını təsəvvür etmək kifayət qədər çətindir;bu, səmərəli deyil. Gürcüstan isə, bir sıra səbəblərə görə Abxaziyada infrastrukturun bərpası ilə məşğul ola bilməz və buna görə də Rusiya rəhbərliyi, o cümlədən də Dövlət Dumasının təzyiqi ilə Abxaziya iqtisadiyyatının sağlamlaşdırılması üçün bu respublikanın dəmir yolu infrastrukturunu bərpa etmək haqqında qərar qəbul edib", - rusiyalı parlamentari hesab edir.
Deputat bildirib ki, Rusiya ora heç bir qoşun yeritməyə hazırlaşmır. Hazırda orada olan mütəxəssislər isə (dəmir yolu tikintisi üzrə dövlət xidmətinin hərbi qulluqçuları), "çox sayda Rusiya vətəndaşlarının yaşağdığı" Abxaziya iqtisadiyyatını bərpa edirlər. Rusiyalı deputat əmindir ki, bununla Gürcüstandan heç nə alınmır və heç nə götürülmür. Belə ki, burada heç bir fikir ayrılığı və Gürcüstanın hüquqlarının pozulması yoxdur.
NATO-nun Baş katibi Yaap de Hoop Sxeffer Rusiyadan dəmir yolu qoşunlarını Abxaziyadan çıxarmağı tələb edib. İyunun 3-də axşam ABŞ Senatı iclasda Rusiyanın Abxaziyanın dəstəklənməsi üzrə hərəkətlərini pisləyən Qətnaməni yekdilliklə təsdiqləyib.
SSRİ-nin dağılmasından sonra Gürcüstan SSR-in tərkibinə muxtariyyət statusuna malik Abxaziya və Cənubi Osetiya müstəqilliklərini elan ediblər. Rəsmi Tbilisinin bu ərazilər üzərində nəzarəti itirməsinə gətirən silalı münaqişədən sonra, nəticəsiz sülh danışıqları aparılır. Tbilisi onlara Gürcüstanın tərkibində geniş muxtariyyət təklif edir ki, bu da separatçıları qane etmir.
