Azərbaycan, Bakı, 12 iyun/ Trend , müxbir E.Babayev/ Azərbaycanın "Hərbi doktrina"sı Milli Məclisin yaz sessiyası çərçivəsində qəbul edilməyəcək. "Artıq Milli Məclisin yaz sessiyası başa çatır və "Hərbi doktrina" hələ də parlamentə daxil olmayıb", - deyə cümə axşamı Trend -a Milli Məclisin Müdafiə və təhlükəsizlik məsələləri daimi komissiyasının üzvü, millət vəkili Pənah Hüseyn bildirib.
Trend -un arayışı: Milli Məclisin yaz sessiyası bu ayın sonunda başa çatır. Azərbaycan parlamentinin ayın sonuna kimi iki iclasının keçirilməsi nəzərdə tutulur. İyunun 13-də keçiriləcək iclasda bir sıra yeni qanunların müzakirəsi planlaşdırılır. Onların arasında "Hərbi doktrina" yoxdur. Digər iclas iyun 19-da keçiriləcək. Həmin iclas Azərbaycan parlamentinin yaranmasının 90 illiyinə həsr olunacaq.
Hüseyn bildirib ki, "Hərbi doktrina"nın qəbulunun hansı səbəbdən gecikməsi millət vəkillərinə məlum deyil.
Trend -un arayışı: "Hərbi doktrina"da Azərbaycan üçün təhlükə mənbəyi və düşmən ölkələr göstərilməlidir. Eyni zamanda, "Hərbi doktrina" ölkəyə qarşı yönələn hərbi təhlükələri müəyyənləşdirən, çeşidləyən, onun təsnifatını verən və müvafiq hökumət strukturlarının vəzifələrini müəyyən edən sənəddir. "Hərbi doktrina"ya əsasən, orduda müqavilə əsasında hərbi xidmət keçmə prinsipi tətbiq edilir. Bundan başqa, sənəddə ordu quruculuğunun bütün sahələri - hərbi sənayenin qurulması, beynəlxalq hərbi əməkdaşlıq kimi məsələlər də əks olunur.
Məqalə müəllifi ilə əlaqə ünvanı: [email protected]
