Azərbaycan, Bakı, 17 iyun / Trend , müxbir C.Babayeva/ Trend İnformasiya Agentliyi Azərbaycan əhalisinin müxtəlif yaş təbəqələri nümayəndələri arasında sorğu keçirib. 60 nəfərin iştirak etdiyi sorğuda məqsəd Azərbaycan vətəndaşlarının ölkə atributlarını nə dərəcə yaxşı bilmələrini müəyyən etməkdən ibarət olub.
25-30 yaşlarında olan gənclər dövlət bayrağında rənglərin düzgün yerləşməsini və onların mənalarını bilirlər. Sorğulanan gənclərin əksəriyyəti dövlət gerbində əks olunan simvolları saymaqda çətinlik çəkiblər. Onlar dövlət himninin iki müəllifindən isə yalnız bəstəkar Üzeyir Hacıbəyovun adını çəkə biliblər. "Himn səslənən zaman siz hansı hissləri keçirirsiniz" sualına əksəriyyət qürur, bəziləri isə kədər və təəssüf hissi keçirdiklərini bildiriblər.
10-15 yaşında olan yeniyetmələr bayraqda rənglərin yerləşmə ardıcıllığını bilməyiblər və onların mənalarını açıqlamaqda çətinlik çəkiblər. Bütün sorğulanan yeniyetmələr dövlət gerbinin hansı formada olduğunu bilməyiblər, lakin himnin hər iki müəllifini bildiklərini söyləyiblər. Onların sözlərinə görə, Azərbaycan himni onlarda heç bir hiss oyatmır.
40-45 yaşlarında olan respondentlər Azərbaycanın bütün atributlarına hörmətlə yanaşdıqlarını bildiriblər. Onlar bayraqda rənglərin ardıcıllığını düzgün sadalayıblar, lakin onların mənalarını açıqlaya bilməyiblər. Sorğulananların əksəriyyəti himnin yalnız bəstəkarını tanıyırlar. Bəzi respondentlər himnin sözlərinin müəllifi kimi Hüseyn Cavidin adını çəkiblər (Himnin sözlərinin müəllifi Əhməd Cavaddır). Onların sözlərinə görə, himni böyük hörmət və fəxrlə dinləyirlər, bəziləri isə himn səslənən zaman onun sözlərini təkrar etdiklərini bildiriblər.
Azərbaycanın üç rəngli, aypara və ulduzlu bayrağı ilk dəfə olaraq Azərbaycan Demokratik Respublikası tərəfindən 1918-ci il noyabrın 9-da qəbul olunub. Göy rəng - türkçülük, qırmızı - müasirlik, yaşıl isə islam ideologiyasını simvolizə edir.
Dövlət gerbi palıd budaqları, sünbül və səkkiz guşəli ulduzun mərkəzində alovun əks olunduğu qalxandan ibarətdir.
"Azərbaycan Respublikasının dövlət himninə dair" Qanun 1992-ci il mayın 27-də qəbul olunub. Qanuna əsasən, dahi bəstəkar Üzeyir Hacıbəyov və şair Əhməd Cavadın "Azərbaycan Marşı" Dövlət himni kimi təsdiq edilib.
Məqalə müəllifi ilə əlaqə ünvanı - trend