Azərbaycan, Bakı, 02 iyul/ Trend , müxbir E.Babayev / Azərbaycanda Qeyri-Hökumət Təşkilatlarına (QHT) dövlət büdcəsindən ayrılan vəsaitin həcmi artırılacaq. "Təbii ki, bu vəsait artırılacaq. 2009-cu ilin dövlət büdcəsi tərtib olunarkən bu məsələyə baxılacaq",-- çərşənbə günü Trend -a Prezidentin İcra Aparatının İctimai-siyasi şöbəsinin QHT-lərlə iş üzrə sektor müdiri Ərəstun Mehdiyev deyib.
Trend -un arayışı: 2007-ci ilin dekabrında prezident İlham Əliyev Azərbaycan Prezidenti yanında Qeyri-Hökumət Təşkilatlarına Dövlət Dəstəyi Şurasının yaradılması barədə fərman verib. Şuranın bu ilin aprel ayında formalaşması başa çatıb və qurum fəaliyyətə başlayıb. QHT- lərə dövlət dəstəyi məqsədilə 2008-ci ilin dövlət büdcəsindən 1,5 milyon manat vəsait nəzərdə tutulub. Bu vəsaitin az bir qismi Şuranın katibliyinin xərclərinin ödənilməsinə, qalan hissəsi isə, qeyri-hökumət təşkilatlarının layihələrinin maliyyələşdirilməsinə yönəldiləcək.
Mehdiyev bildirib ki, 1, 5 milyon manat başlanğıc üçün yetərlidir. "Müəyyən təcrübə toplandıqdan və ilkin layihələrin qiymətləndirilməsi başa çatdıqdan sonra nəticələr nəzərdən keçiriləcək. Növbəti büdcədə vəsaitin artımı mümkündür. Dövlətin imkanları artdıqca, bu sahəyə ayrılan vəsait də artırılacaq"- deyə o bildirib.
Məqalə müəllifi ilə əlaqə ünvanı: [email protected]
