Azərbaycan, Bakı, 07 iyul/ Trend , müxbir E.Babayev/ Dünya Azərbaycanlıları Konqresi (DAK) Azərbaycanda bu ilin payızında keçiriləcək prezident seçkisində hər hansı bir namizədi müdafiə etməyəcək. "Yalnız mən seçkidə namizədliyimi irəli sürəcəyim halda, həmsədri olduğum DAK məni dəstəkləyəcək və bu dəstək açıq şəkildə olmayacaq",- deyə bazar ertəsi Trend - a VHP sədri , millət vəkili Sabir Rüstəmxanlı bildirib.
Trend -un arayışı: DAK daxilində yaranmış narazılıqlar nəticəsində, qurumun İdarə Heyəti (İH) iki yerə bölünüb. İH-nin 16 nəfər üzvündən 11-i Sabir Rüstəmxanlını DAK-ın sədri seçib. İH-nin qalan üzvləri və tərəfdarları Qulamrza Səbri Təbrizinin sədrliyini dəstəkləyib və iyunun 21-23-də Brüsseldə Avropa Parlamentində qurultay keçiriblər. Rüstəmxanlının rəhbərlik etdiyi DAK-ın qurultayında 25 ölkədən 300- dək nümayəndə və qonaq iştirak edib. Qurultayda DAK-ın Nizamnaməsi və Məramnamsəinə dəyişikliklər qəbul olunub. DAK- da həmsədrlik institutu yaradılıb, Sabir Rüstəmxanlı və Firudin Pərvizniya DAK- ın həmsədrləri seçilib. Qulamrza Səbri Təbrizi Köln qurultayını qeyri - legitim hesab edib.
Rüstəmxanlı bildirib ki, DAK Güney Azərbaycan problemi, Dağlıq Qarabağ münaqişəsi, o cümlədən diaspor işi ilə məşğul olur. "Ona görə də bu qurumun seçkiyə açıq şəkildə qoşulması mümkün deyil. Ancaq, təbii ki, DAK prosesə açıq formada qatılmadan, kənardan mənə dəstək verəcək. Namizəd olmayacağım təqdirdə isə, DAK hər hansı bir namizədi müdafiə etməyəcək"- deyən Rüstəmxanlı özünün prezidentliyə namizəd olub-olmayacağının da qeyri-müəyyən olduğunu deyib. " VHP iyulun 15- dək Ali Məclisin toplantısını keçirib, qarşıdan gələn prezident seçkisi ilə bağlı yekun qərarını verəcək. Partiya üzvlərinin iradəsi ondan ibarətdir ki, mən seçkidə namizəd olum. Ancaq başqa amillər də nəzərə alınmalıdır. Seçki yolu ilə dəyişikliyə nail olmaq çətindir. Bütün bu və digər məsələləri nəzərə alaraq, yekun qərar verəcəyik"- deyə o bildirib.
VHP Milli Azadlıq Hərəkatının liderlərindən olan Sabir Rüstəmxanlının rəhbərliyi altında 1992- ci ilsentyabrın 26 - da bir qrup ziyalı tərəfindən yaradılıb. Həmin ilin noyabrında dövlət qeydiyyatına alınan partiyanın 80 rayonda yerli təşkilatı fəaliyyət göstərir, 35 mindən artıq üzvü var. VHP 1995, 2000, 2005- ci illərin parlament, 2003-cü ilin prezident, 1999, 2004-cü illərin bələdiyyə seçkilərində iştirak edib. Partiyanın sədri millət vəkili, xalq şairi S.Rüstəmxanlı 1991-95- ci illərdə mətbuat və informasiya naziri, 2003- cü il prezident seçkilərində isə prezidentliyə namizəd olub. Hazırda VHP növbəti IV qurultayına hazırlaşır.
Məqalə müəllifi ilə əlaqə ünvanı: [email protected]