Azərbaycan, Bakı, 17 iyul/ Trend , müxbir E.Babayev/ Azərbaycanın müxalif Böyük Quruluş Partiyası (BQP) prezident seçkisində öz namizədi ilə iştirak etməyəcək. "Mən özüm və partiya üzvlərinin əksəriyyəti belə fikirdə idik ki, seçkiyə öz namizədimizlə qatılaq. Ancaq bu rəy dəyişib və BQP seçkidə öz namizədi ilə iştirak etmək imkanında deyil", cümə axşamı Trend -a BQP sədri, millət vəkili Fazil Qəzənfəroğlu bildirib.
Trend -un arayışı: Azərbaycanda prezident seçkisinin oktyabrın 15-də keçirilməsi nəzərdə tutulur. Mərkəzi Seçki Komissiyası bu ayın sonunda seçkiyə rəsmən start verəcək və seçki gününün dəqiq tarixini açıqlayacaq.
Qəzənfəroğlu seçkiyə öz namizədləri ilə qatıla bilməmələrini BQP-nin qərargahının olmaması ilə izah edib. "Praktiki baxımdan seçkiyə qoşulmaq imkanımız olmayacaq. Qərargahın olmaması seçkidə ədalətsiz mübarizənin olacağı deməkdir və bu baxımdan seçkidə iştirakın mənası qalmır", - deyən Qəzənfəroğlu bildirib ki, seçkiyə rəsmən start veriləndən dərhal sonra BQP-nin Ali Məclisi partiyanın seçki ilə bağlı yekun mövqeyini bəyan edəcək. "Çox güman ki, başqa bir müxalifət namizədini dəstəkləmək yolu tutacağıq. Namizədlər tam bəlli olduqdan sonra kimə dəstək verəcəyimizi müəyyən edəcəyik", - deyə Qəzənfəroğlu əlavə edib.
Müxalifətyönlü BQP 2004-cü ildə yaradılıb, 2005-ci ildə dövlət qeydiyyatına alınıb. Partiyanın sədri Qəzənfəroğlu Milli Məclisin deputatıdır.
Məqalə müəllifi ilə əlaqə ünvanı: [email protected]
