Azərbaycan, Bakı, 23 iyul/ Trend , müxbir C.Babayeva/ Azərbaycan müxalifətinin Məşvərət Şurasına yeni siyasi qüvvələrin cəlb olunmaması barədə qərar qəbul olunub. "Məşvərət Şurasının formatı qaneedicidir və yeni siyasi qüvvələrin cəlb olunmasına ehtiyac yoxdur", - deyə Şurada təmsil olunan Azərbaycan Milli İstiqlal Partiyasının (AMİP) mətbuat və təbliğat katibi Əli Orucov cümə axşamı Trend -a bildirib.
Trend -un arayışı: Azərbaycanın müxalifət partiyalarının Məşvərət Şurası ötən il yaradılıb və hazırda qurumda Azərbaycan Demokrat, Müsavat, Milli İstiqlal partiyaları və "Azərbaycan Naminə" İctimai Forum təmsil olunur. Şurada təmsil olunmuş Tərəqqi Partiyası prezident seçkisində hakimiyyətin namizədəni dəstəkləmək barədə qərar qəbul etdiyindən qurumu tərk edib. Yaşıllar Partiyası Məşvərət Şurasında təmsil olunmaq üçün iki dəfə müraciət etsə də, qurum başqa siyasi partiyaların Şurada təmsil olunmasını məqbul hesab etməyib.
Orucovun sözlərinə görə, digər partiyaların Məşvərət Şurasında təmsil olunmaqla bağlı müraciətləri daxil olmadığına görə, formatın cümə axşamı AMİP-in qərargahında keçirilən toplantısında bu məsələ müzakirə olunmayıb. "Şura üzvləri əməkdaşlığı hazırki formatda davam etdirmək barədə qərar qəbul edib", - deyə o bildirib.
Onun bildirdiyinə görə, Məşvərət Şurasının toplantısında əsas müzakirə mövzusu prezident seçkisi və ölkədəki ictimai-siyasi vəziyyət olub. "Geniş müzakirələrdən sonra prezident seçkisi ilə bağlı məsləhətləşmələrin davam etdirilməsi və seçki ilə bağlı müəyyən məsələlərdə mövqelərin uzlaşdırılmasına nail olmaq qərara alınıb", - deyə Orucov bildirib.
Orucov Şurada təmsil olunmuş Tərəqqi Partiyasının sədri Çingiz Dəmiroğlunun siyasi mövqeyi dəyişdiyinə görə toplantıya dəvət olunmadığını bildirib.
Məqalə müəllifi ilə əlaqə saxlamaq üçün ünvan: [email protected]
