Azərbaycan, Bakı, 07 avqust / Trend , müxbir E.Babayev/ Azərbaycanın iki müxalif partiyası - Xalq Cəbhəsi və Müsavat arasında prezident seçkiləri ilə bağlı birgə əməkdaşlıq barədə sənədin imzalanması nəzərdən keçirilir. "Bu qənaətə gəlsək ki, birgə mübarizə aparmaq imkanları mümkündür, onda əməkdaşlıq haqqında daha ciddi düşünmək olar. Yəni birgə fəaliyyətin detallarını özündə əks etdirən sənədin imzalanması da baş verə bilər", cümə axşamı Trend -a Müsavatın Məclis sədri Sülhəddin Əkbər bildirib.
Trend -un arayışı: Azərbaycanda prezident seçkiləri oktyabrın 15-də keçiriləcək. Üç müxalifət partiyasının (Xalq Cəbhəsi, Liberal, Vətəndaş və İnkişaf) təmsil olunduğu "Azadlıq" bloku seçkiləri boykot etmək barədə qərar verib. Avqustun 2-də isə Müsavatın Məclisində seçkilərdə iştirakdan imtina olunması barədə qərar çıxarılıb. Bundan sonra AXCP ilə Müsavatın birgə əməkdaşlığı məsələsi gündəmə gəlib.
Əkbər bildirib ki, artıq Müsavat başqanı İsa Qəmbər və AXCP sədri Əli Kərimli əməkdaşlıq istiqamətində müsbət fikirdə olduqlarını bildiriblər. "Düşünürəm ki, müxalifətin əsas qüvvələrinin seçki ilə bağlı eyni mövqedən çıxış etməsi birgə fəaliyyət üçün əlverişli zəmin yaradır. Mənə elə gəlir ki, yaxın vaxtlarda xüsusilə AXCP və Müsavatın bir araya gəlməsi tamamilə realdır və bunun üçün əlverişli siyasi zəmin var", - deyən Əkbər hesab edir ki, seçkiyə birgə qiymət vermək, seçkinin nəticələrini birgə dəyərləndirmək istiqamətində əməkdaşlıq mümkündür. Yəni həm seçki kampaniyası dövründə, həm də seçkidən sonra birgə mübarizə imkanlarının araşdırılmasına ehtiyac var. "Azərbaycanda demokratik resurslar məhdudlaşdırılıb və bu amil birliyi diktə edir. Mətbuatda belə fikirlər səslənir ki, ümumiyyətlə, seçkidə iştirakdan imtina edən partiyaların koalisiyası yaradılacaq. Ola bilsin ki, hər hansı təşkilati struktur olmasın, amma hər halda birgə fəaliyyət ola bilər", - deyə Əkbər əlavə edib.
AXCP Ali Məclisinin sədri Qulamhüseyn Əlibəyli isə cümə axşamı Trend -a bildirib ki, Xalq Cəbhəsi və Müsavat indiyə qədər vaxtaşırı əməkdaşlıq ediblər. "Lakin bütövlükdə bütün məsələlərə dair vahid siyasətin yeridilməsi mümkün olmayıb. Bəzi hallarda isə bu partiyalar arasında ciddi çəkişmələr olub. Buna baxmayaraq, hesab edirəm ki, indi müəyyən məsələlərlə bağlı razılığa gəlmək və əməkdaşlıq etmək mümkündür", - deyə Əlibəyli bildirib.
Müxalifəti təmsil edən AXCP hazırda "Azadlıq" siyasi blokunun üzvü və həmtəsisçisidir. Partiyanın qurucusu və 2000-ci ilə qədər sədri Azərbaycanın eks-prezidenti mərhum Əbülfəz Elçibəy olub. 2000-ci ildən indiyədək AXCP-yə keçmiş dövlət katibi, sabiq deputat Əli Kərimli sədrlik edir.
Müxalifəti təmsil edən Müsavat Partiyası isə 1992-ci ildə yaradılıb. Partiyanın başqanı İsa Qəmbər Azərbaycan parlamentinin eks-spikeri (1992-93-cü illərdə) və 2003-cü ildə keçirilmiş prezident seçkisində prezidentliyə namizəd olub. Partiya beş nəfər deputatla parlamentdə təmsil olunur.
Məqalə müəllifi ilə əlaqə ünvanı: [email protected]
