Azərbaycan, Bakı, 04 sentyabr/ Trend , müxbir R.Novruzov/ Avropa Şurası (AŞ) Azərbaycan müxalifətinin seçkilərə beynəlxalq müşahidəçilərin göndərilməməsinə dair müraciətini nəzərdən keçirə bilər.
Azərbaycanda prezident seçkisi oktyabrın 15 - də keçiriləcək. Müxalifəti təmsil edən partiyaların əksəriyyəti seçkini boykot edir. "Azadlıq" blokunda təmsil olunan Azərbaycan Xalq Cəbhəsi Partiyası (AXCP) müxalifətin yeni əməkdaşlıq mərkəzinin yaradılması ilə bağlı danışıqlara başlayıb. Danışıqlarda "Azadlıq" blokuna daxil olan partiyalarla (AXCP, Azərbaycan Liberal Partiyası, Vətəndaş və İnkişaf Partiyası) yanaşı, Müsavat, Açıq Cəmiyyət, Klassik Xalq Cəbhəsi partiyaları və "Azərbaycan Naminə" İctimai Forumun iştirak etdiyi bildirilir. Bu partiyalar seçkilərə beynəlxalq müşahidəçilərin göndərilməməsi xahişi ilə AŞ, ATƏT və Avropanın digər qurumlarına müraciət qəbul etmək niyyətindədirlər.
"Müraciət əsaslı şəkildə arqumentləşdirilərsə, AŞ onu nəzərdən keçirəcək", - Avropa Şurası Parlament Assambleyasının Azərbaycan üzrə həmməruzəçisi Andres Herkel cümə axşamı telefonla Tallindən Trend - a bildirib.
Herkelin sözlərinə görə, Avropa Şurası seçkiqabağı prosesdə iştirak etmək və Azərbaycanda prezident seçkilərinin gedişini izləmək niyyətindədir.
Andres Herkel Avropa Şurasının seçkilərə bir neçə gün qalmış Bakıya gələcək müşahidəçi qrupuna rəhbərlik edəcək. Azərbaycanın Mərkəzi Seçki Komissiyası prezidentliyə iddia edən 20 nəfərin namizədliyini təsdiqləyib. Onlardan ikisinin namizədliyi rəsmi təsdiqlənib.
Müəlliflə əlaqə saxlamaq üçün elektron ünvan- [email protected]
