Azərbaycan, Bakı, 25 sentyabr / Trend / Azərbaycan müxalifətini təmsil edən Müsavat Partiyası Bakı Şəhər İcra Hakimiyyəti paytaxtda kütləvi aksiyaların keçirilməsinə icazə vermədiyi üçün İnsan Haqqları üzrə Avropa Məhkəməsinə şikayət verməyə hazırlaşır. "Yaxın günlərdə Ali Məhkəməyə, daha sonra isə İnsan Haqqları üzrə Avropa Məhkəməsinə müraciət edəcəyik", bu barədə cümə axşamı Trend -a Müsavat Partiyası Mərkəzi İcra Aparatının rəhbəri Arif Hacılı bildirib.
Trend -un arayışı: Müsavat Partiyası bir necə dəfə kütləvi aksiya keçirilməsinə icazə verilməsi üçün Bakı Şəhər İcra Hakimiyyətinə müraciət edib. Lakin İcra Hakimiyyəti partiyanın müəyyənləşdirdiyi yerlərdə aksiyanın keçirilməsinə icazə verməyib. Müsavat bu qərarlardan Səbail rayon Məhkəməsinə şikayət verib. Səbail rayon Məhkəməsi və Apellyasiya Məhkəməsi partiyanın şikayətini təmin etməyib.
"Bakı Şəhər İcra Hakimiyyətinin qərarının Konstitusiyaya və "Sərbəst toplaşmaq azadlığı haqqında" qanuna zidd olduğunu Azərbaycana və beynəlxalq ictimaiyyətə sübüt edəcəyik", - deyə Hacılı əlavə edib.
Müsavat Partiyası 1911-ci ilin oktyabrında Bakıda yaradılıb. Müsavat Partiyasının III (Bərpa) Qurultayı 1992-ci il noyabrın 7-də Bakıda Respublika sarayında keçirilib. Gizli səsvermənin yekunları əsasında İsa Qəmbər əksəriyyət səslə Müsavat Partiyasının başqanı seçilib.
Qəmbər Azərbaycan parlamentinin eks-spikeri (1992-93-cü illərdə) və 2003-cü ildə keçirilmiş prezident seçkisində prezidentliyə namizəd olub. Partiya parlamentdə dörd nəfər deputatla təmsil olunur.
Məqalə müəllifi ilə əlaqə ünvanı: [email protected]