Азярбаycan, Bakı, 27 sentyabr / Trend / Azərbaycan prezidenti İlham Əliyev müsəlmanların müqəddəs Ramazan bayramı münasibətilə Azərbaycan xalqını və dünyanın müxtəlif ölkələrində yaşayan bütün soydaşlarımızı təbrik edib.
Təbrikdə qeyd olunub ki, ilahi hikmətlər xəzinəsi Qurani-Kərimin nazil olduğu Ramazan ayı insanların qəlbini və təfəkkürünü nurlandıran, onları əmin-amanlığa, vəhdətə, əxlaqi saflığa dəvət edən mübarək aylardandır. Müsəlmanlar bu ayda Allah və din qarşısında vicdani borcunu yerinə yetirmək fürsəti əldə edir, xeyirxah əməllərin, şəfqət və mərhəmət duyğularının fərəhini, mənəvi-ruhi kamilliyin nəfs üzərində qələbə sevincini yaşayırlar.
"Orucluğun sınaqlarından alnıaçıq
çıxan mömin vətəndaşlarımız Ramazan
günlərini qürur hissləri ilə yola salır,
məmnunluqla bayram sevincini bölüşürlər. Hər
yerdə xalqımızın və dövlətimizin
firavanlığı, rifahı üçün
diləklər edilir, şəhidlərimizin ruhuna dualar oxunur.
Bütün bu xeyirxah niyyətlərə qoşularaq,
Azərbaycanın müstəqilliyi və ərazi
bütövlüyü uğrunda şəhid olmuş
qəhrəman övladlarımızın xatirəsini
böyük ehtiramla yad edir, Allahdan onlara rəhmət,
ailələrinə səbir diləyirəm" - prezidentin
təbrikində qeyd olunub.
Daha sonra vurğulanır ki, hər il Azərbaycanda
böyük fərəh və könül xoşluğuyla
keçirilən orucluq mərasimləri xalqımızın
öz milli-mənəvi dəyərlərinə sadiqliyini
nümayiş etdirir, cəmiyyətimizdə birlik və
həmrəyliyin, dostluq və qardaşlıq münasibətlərinin
təntənəsinə çevrilir.
Məqalə müəllifi ilə əlaqə ünvanı: [email protected]