...

Azərbaycanın müxalifət partiyalarının mərkəzinin bərpa olunmasına zərurət yaranmayıb

Siyasət Materials 23 Oktyabr 2008 12:53 (UTC +04:00)

Azərbaycan, Bakı, 23 oktyabr / Trend , müxbir C.Babayeva/ Prezident seçkisi ilə əlaqədar fəaliyyətinə müvəqqəti fasilə vermiş Azərbaycanın müxalifət partiyalarının Demokratik Seçki Mərkəzinin (DSM) bərpa olunmasına zərurət yaranmayıb.

"Demokratik Seçki Mərkəzinin fəaliyyəti yalnız Seçki Məcəlləsinə dəyişikliklərin edilməsinin aktual olduğu məqamlarda bərpa oluna bilər", - deyə DSM-də təmsil olunan Azadlıq Partiyasının sədri Əhməd Oruc cümə axşamı Trend -a bildirib.

Orucun sözlərinə görə, Mərkəzdə təmsil olunan və Demokratiya Uğrunda İttifaqın üzvü olan partiyalar (Klassik Xalq Cəbhəsi Partiyası, Azərbaycan Milli-Demokrat Partiyası, Azadlıq Partiyası, Böyük Azərbaycan Partiyası) əsasən İttifaqda fəaliyyət göstərirlər. "Mərkəzdə təmsil olunan partiyalar Seçki Məcəlləsinə dəyişikliklərin edilməsi ilə bağlı təşəbbüslər irəli sürərlərsə, həmin məsələlərlə bağlı müzakirələr bərpa oluna bilər", - deyə o əlavə edib.

Trend -un arayışı: Bu ilin yanvarında yaradılan DSM-də doqquz müxalifət partiyası - Klassik Xalq Cəbhəsi Partiyası, Azadlıq, Milli-Demokrat, Böyük Quruluş, Bütöv Azərbaycan Xalq Cəbhəsi, Böyük Azərbaycan, Açıq Cəmiyyət, Təkamül və Yaşıllar Partiyası təmsil olunur. Mərkəz Seçki Məcəlləsinə dəyişikliklərin edilməsi istiqamətində fəaliyyət göstərmək məqsədilə yaradılmışdı. Sentyabr ayında DSM prezident seçkisi ilə əlaqədar fəaliyyətinə müvəqqəti fasilə vermişdi.

Məqalə müəllifi ilə əlaqə saxlamaq üçün ünvan: [email protected]

Xəbər lenti

Xəbər lenti