Azərbaycan, Bakı, 14 noyabr / Trend , müxbir S.Əliyev/
"Astana Qazaxıstan neftinin Azərbaycanın Bakı-Supsa boru kəməri vasitəsilə Qara dəniz sahillərinə nəqlinin mümkünlüyü ilə bağlı danışıqlar aparır", - Qazaxıstanın energetika naziri Sauat Mınbayev cümə günü Bakıda keçirilən IV Enerji Sammitində deyib.
Onun sözlərinə görə, Bakı-Supsa boru kəmərindən istifadə Qazaxıstan neftinin Qara dəniz sahillərinə nəqlinin səmərəliliyini xeyli artıra bilər.
"Qazaxıstan bu layihəyə sərmayə qoymağa hazırdır", - nazir deyib.
Mınbayevin sözlərinə görə, Qazaxıstanda 2008-ci ildə - 70 mln., 2010-cu ildə - 80 mln., 2015-ci ildə - 100 mln. ton neft hasil olunacaq.
Bakı-Supsa boru kəməri 1999-cu il aprelin 17-də istismara verilib. Hazırda "Azəri-Çıraq-Günəşli" dəniz yatağı blokundan hasil olunan neft bu kəmər vasitəsilə nəql olunur. Boru kəmərinin uzunluğu 837 kilometrdir.
Məqalə müəllifilə əlaqə ünvanı: [email protected]