İran, Tehran, 23 dekabr / Trend , müxbir A.Namdari/ İranın Xarici İşlər Nazirliyi beynəlxalq və siyasi araşdırmalar idarəsinin rəhbəri bildirib ki, İran Orta Asiya və Qafqazda diplamatik fəaliyyətini gücləndirməlidir.
Dekabrın 23-də İİR-in Prezident Aparatı Strateji Araşdırmalar Mərkəzində "İran və regionda sabitlik təhlükəsi" mövzusunda iclas keçirilib. İclasda ölkənin Xarici İşlər Nazirliyi beynəlxalq və siyasi araşdırmalar idarəsinin rəhbəri Rəsul Musəvi, Hindistan məsələləri üzrə ekspert Pir Məhəmməd Mollazehi və Yaxın Şərq məsələləri üzrə ekspert Həmidrza Dehqani iştirak ediblər.
Trend -un Tehrandakı müxbirinin məlumatına əsasən, Rəsul Musəvi çıxışında bildirib ki, İran Rusiya ilə əməkdaşlıq etməklə Qafqazda nüfuzunu artıra bilər. Onun sözlərinə görə, Rusiyanın daxilində baş verən proseslər müxtəlif sahələrdə araşdırılmalıdır. Idarə rəhbəri əlavə edib ki, hazırda Putin və Medvedyev arasındakı rəqabət Rusiyanın güc strukturlarında problemlər yaşandığını göstərir.
Musəvi bildirib ki, Moskva və II Aleksinin ölümündən sonra, bütün Rusiyanın patriarxı yeri uğrunda Moskva, İstanbul, Yunan və Gürcüstan kilsələri rəqabət aparır.
Onun sözlərinə görə, Rusiya və Qafqazda baş verənlər İran üçün çox əhəmiyyətlidir. Bundan başqa, Rusiyada Putinin nüfuzu altında olan oliqarxların və orqanların, yaxud Yeltsini dəstəkləyən qüvvələrin güclənməsi də Iranın diqqətində olmalıdır.
Musəvi Gürcüstandan Qərb qüvvələrinin çıxarılmasını Qafqazda baş verən mühüm dəyişikliklərdən hesab edir. Onun sözlərinə görə, bu prosesin Birləşmiş Ştatların keçmiş Dövlət Katibi Henri Kissincerin Moskvaya səfəri ilə eyni vaxtda baş verməsi çox mənalıdır.
Musəvinin fikrincə, Henri Kissincerin Moskvaya səfəri ABŞ-ın Gürcüstanda Rusiyaya zidd maraqlarının olmadığını və onlar arasında razılığın mövcudluğunu göstərir.
"NATO-nun genişlənməsi və Rusiya - ABŞ razılığı İranın mənafeyinə təhlükədir. Digər tərəfdən, Ermanistan və Türkiyə arasında əlaqələr, Türkiyənin yeni diplomatiyası da İranı düşündürür",- deyə Musəvi bildirib.
İranın Qafqaz probleminin həlli üçün irəli sürdüyü layihə dən danışarkən Musəvi bildirib ki, Qafqazdakı problemlərin həlli üçün İrandan başqa digər ölkələrin də layihələri var. İranın layihəsinin qəbul olunmaması , onun regiondakı roluna təsir göstərmir.
"Hazırda Qafqazda Rusiyanın rolu daha böyükdür və digər ölkələr layihələr təqdim etməklə, Qafqazdakı problemin həllində iştirak edirlər. İran Rusiya ilə birlikdə, Qafqazda daha əhəmiyyətli rol oynaya bilər",- deyə Musəvi bildirib.
Musəvi Qarabağ məsələsində İranın Ermənistanla yaxın münasibətlərini bu ölkənin Qafqazda nufuzunun göstəricisi hesab edib..
Müəlliflə əlaqə saxlamaq üçün elektron ünvan [email protected]
