Azərbaycan, Bakı, 21 yanvar / Trend , müxbir A.Hüseynbala/ Azərbaycanın müxalif partiyası İctimai Televiziyadan efir vaxtı istəyib.
"Milli Televiziya və Radio Şurasının xarici radiostansiyaların FM tezliyində yayımlanmasına və türk dilində yayımlara qadağa qoymasına etiraz olaraq bu qurumun qarşısında etiraz aksiyası keçirmək üçün müraciətimizə Bakı Şəhər İcra Hakimiyyəti razılıq verməmişdi. Bizə etirazımızı informasiya vasitələri vasitəsilə bildirmək tövsiyə olunub", - çərşənbə günü Trend -a Milli Qurtuluş Partiyasından bildirilib.
Məlumatda qeyd edilir ki, efir
vaxtı ayrılmasa, Milli Televiziya və Radio Şurası,
eləcə də İctimai Televiziyanın binaları
qarşısında piketlər keçiriləcək: "Biz
həm də Konstitusiya dəyişikliklərinə
mövqeyimizin ölkə ictimaiyyətinə
çatdırılması üçün efir vaxtı
istəyirik", - məlumatda vurğulanır.
Azərbaycanın İctimai Televiziyası hər bir siyasi partiyaya ayrıca efir vaxtının ayrılmasının ictimai yayım xidmətinin prinsiplarinə uyğun olmadığını bildirib.
"Bir partiyaya İctimai Televiziyada efir vaxtı ayrılarsa, o zaman bütün partiyalara da eyni efir vaxtı ayırmalıyıq. Bu isə həm ictimai yayım prinsiplərinə ziddir, eyni zamanda fiziki baxımdan da mümkün deyil", - daha öncə Trend -a İctimai Televiziyanın İctimaiyyətlə əlaqələr şöbəsinin rəhbəri Tahir Məmmədov bildirib.
MTRŞ yanvarın 1-dən xarici radiostansiyaların milli tezliklərdə yayımının dayandırılması barədə qərar çıxarıb. Şuranın digər qərarına görə, əcnəbi, o cümlədən türk dilində filmlərin yayımı qadağan edilib.
Məqalə müəllifi ilə əlaqə ünvanı: [email protected]