Azərbaycan, Bakı, 03 fevral/ Trend , müxbir A.Hüseynbala/ Bakıda sosialist yönümlü partiyaların Əlaqələndirmə Şurası və Analitik İnformasiya Mərkəzi yaradılıb.
"Xalq-Sosialist, Demokratik Sol və Mütərəqqi Sosialist partiyalarının görüşündə sosialist təmayüllü partiyaların Əlaqələndirmə Şurasının və həmin orqanın analitik informasiya mərkəzinin formalaşdırılması haqqında razılığa gəlinib"? - çərşənbə axşamı Trend -a Mütərəqqi Sosialist Partiyasının (MSP) sədri Rüstəm Şahsuvarov bildirib.
Azərbaycanda sol təmayüllü siyasi düşərgədə uzun illərdir süstlük yaranıb, solçu partiyalar ölkənin siyasi həyatında passiv rol oynayırlar. Ona görə də ayrı-ayrılıqda fəaliyyət göstərən solçuların birliyinə ehtiyac yaranıb.
Azərbaycanda Sosial Demokrat,Kommunist, Azərbaycan Vahid Kommunist, Marksizm-Leninizm Platformasında Azərbaycan Kommunist, Yeni Nəsil Azərbaycan Kommunistləri partiyaları kimi solçu siyasi təşkilatlar fəaliyyət göstərir.
Onun sözlərinə görə, yeni yaradılan Əlaqələndirmə Şurasının fəaliyyəti və istiqamətləri haqqında yaxın zamanda Xalq Sosialist və Demokratik Sol partiyalarının sədrləri Rövşən Hüseynov və Elşən Manafovla birgə keçirilən mətbuat konfransında məlumat veriləcək.
Məqalə müəllifi ilə əlaqə ünvanı: [email protected]
