Azərbaycan, Bakı, 06 mart / Trend , müxbir E. Tarıverdieva /
Rusiyanın NATO-da daimi nümayəndəsi Dmitri Roqozinin fikrincə, Şimali Atlantika bloku (NATO) KTMT-yə üzv ölkələrlə problemlərinin həllinə kömək məqsədi ilə Kollektiv Təhlükəsizlik Müqaviləsi Təşkilatı (KTMT) ilə münasibətləri sahmana salmalıdır.
"NATO KTMT-yə yumşaq münasibət bəsləsəydi, Qırğızıstan, Qazaxıstan və digər təşkilata üzv olan ölkələrlə məsələlərin həlli Şimali Atlantika bloku üçün sadələşərdi", - Trend -a müsahibə zamanı Roqozin deyib.
Diplomat düşünür ki, KTMT-nin NATO ilə münasibətləri formalaşdırmaq istəyi var.
"Qarşı tərəfdə isə bu istəyin olmaması Qırğızıstandakı ABŞ Hərbi Hava Qüvvələrinin "Manas" hərbi bazasının bağlanması məsələsində məlum oldu", - Roqozin qeyd edib.
"Manas" bazası ilə bağlı məsələyə Əfqanıstandakı vəziyyətin nizamlanması kontekstindən yanaşmaq lazımdır. Bu məsələdə isə KTMT heç də sonuncu rol oynamır, - Roqozin vurğulayıb.
2009-cu il fevralın 20-də Qırğızıstan Xarici İşlər Nazirliyi ABŞ hökumətini "Manas" hərbi bazasının fəaliyyəti barədə razılaşmanın qüvvədən düşdüyünü bildirərək rəsmi surətdə məlumatlandırıb. Aviabaza BMT mandatı ilə koalisiya qüvvələri tərəfindən Əfqanıstanda "Sarsılmaz azadlıq" adlı antiterror əməliyyatına dəstək məqsədi ilə Qırğızıstanda 2001-ci ildə açılmışdır. Bazada 1,2 min ABŞ hərbiçiləri, hərbi və yanacaqdolduran təyyarələr yerləşir.
Məqalə müəllifi əlaqə ünvanı: [email protected]
