Azərbaycan, Bакı, 14 aprel / Trend , müxbir A.Hüseynbala /
Azərbaycanın müxalif partiyasının Məclisinin növbəti sessiyasında bələdiyyə seçkilərində iştirakla bağlı məsələ müzakirə olunacaq.
"Bu toplantıda partiyanın yerli təşkilatlarına seçkilərə hazırlıqla bağlı xüsusi tapşırıqlar veriləcək", - çərşənbə axşamı Trend -a Müsavat Partiyası Mərkəzi İcra Aparatının rəhbəri Arif Hacılı bildirib.
Trend -un arayışı: Azərbaycanda bələdiyyə seçkilərinin 2009-cu ilin payızında keçirilməsi nəzərdə tutulur. Bundan əvvəl iki dəfə - 1999 və 2004-cü illərdə bələdiyyə seçkiləri keçirilib.
Hacılının sözlərinə görə, Məclicin sessiyasında bələdiyyə seçkiləri ilə bağlı strategiya da müzakirə olunaraq qəbul ediləcək. "Bu sənəddə partiyanın seçkilərdə koalisiyada, yoxsa təkbaşına iştirakı məsələsi də nəzərdə tutulur", - Müsavat funksioneri əlavə edib.
Mərkəzi İcra Aparatının rəhbəri deyib ki, partiya bütün məntəqələrdə bələdiyyə üzvlüyünə namizədlər irəli sürmək niyyətindədir: "Bütün bələdiyyə yerlərinə iddialı olmasaq da, amma bütün məntəqələrdə bir neçə namizəd irəli sürməyimiz mümkündür", - Hacılı vurğulayıb.
Müsavat funksionerinin fikrincə, bələdiyyə seçkilərində digər partiyalarla referendumda olduğu kimi əməkdaşlıq etmək daha məqsədəuyğundur. "Referendumda müxalifətin iki təşviqat qrupu qeydiyyatdan keçmişdi və biz birgə əməkdaşlığı reallaşdıra bildik. Düşünürük ki, bələdiyyə seçkilərində bütün partiyalar öz namizədlərini hər bir məntəqə üzrə irəli sürməli, sonrakı təbliğat kampaniyasında və səsvermə günü bütün partiyaların namizədləri eyni şəkildə dəstəklənməlidir", - Hacılı bildirib.
Müsavat Partiyası 1911-ci ilin oktyabrında Bakıda yaradılıb. Müsavat Partiyasının (Bərpa) Qurultayı 1992-ci il noyabrın 7-də Bakıda Respublika sarayında keçirilib. Gizli səsvermənin yekunları əsasında İsa Qəmbər əksəriyyət səslə Müsavat Partiyasının başqanı seçilib.
Qəmbər Аzərbаycan pаrlаmеntinin еks-spikеri (1992-93-cü illərdə) və 2003-cü ildə keçirilmiş prezident seçkilərində prezidentliyə namizəd olub. Pаrtiyа 4 nəfər deputatla parlamentdə təmsil olunur.
Məqalə müəllifi ilə əlaqə ünvanı:[email protected]
