Azərbaycan, Bаkı, 05 may / Trend , müxbir A.Hüseynbala /
Azərbaycanın iqtidaryönlü partiyası bələdiyyə seçkilərində iştirak edəcək namizədlərin may ayının axırına qədər müəyyənləşdirilməsi üçün bütün rayon təşkilatlarına tapşırıq verib.
"Namizədlər müəyyənləşdiriləndən sonra həmin siyahı partiyanın Mərkəzi Aparatına təqdim olunacaq", - çərşənbə axşamı Trend -a Ana Vətən Partriyasının (AVP) sədri, millət vəkili Fəzail Ağamalı bildirib.
Trend -un arayışı: Azərbaycanda bələdiyyə seçkisi 2009-cu ilin payızında, parlament seçkisi isə 2010-cu ilin payızında keçirilməlidir. Bundan əvvəl iki dəfə - 1999 və 2004-cü illərdə yerli özünüidarəetmə orqanlarına seçkilər keçirilib.
Ağamalının sözlərinə görə, rayonlarda bələdiyyələrə seçilmək niyyətində olan namizədlərlə bağlı partiyada xüsusi araşdırmalar aparılacaq. "Biz istəyirik ki, irəli sürəcəyimiz namizədlərin seçilmək şansları kifayət qədər yüksək olsun", - partiya sədri əlavə edib.
O bildirib ki, bu seçkilərdə bələdiyyələrə daha çox partiya üzvünün seçilməsini arzulayırlar. "Partiyanın sentyabr ayında keçiriləcək Ali Məclisinin iclasında bələdiyyə üzvlüyünə irəli sürəcəyimiz namizədlərin tam siyahısı təsdiqlənəcək", - Ağamalı vurğulayıb.
Hakimiyyətyönlü AVP 1991-ci ildə yaradılıb. Partiya parlamentdə iki deputatla təmsil olunub.
Məqalə müəllifi ilə əlaqə ünvanı:[email protected]
