Azərbaycan, Bakı, 17 iyun /müxbir Trend C.Babayeva/ Azərbaycan Yaşıllar Partiyası (AYP) bələdiyyə seçkisində iştirak etmək üçün təşəbbüs qrupu yarada bilər.
"Partiyanın dövlət qeydiyyatı olmadığına görə, seçkiyə prezident seçkisində olduğu kimi "Yaşıl siyasət" təşəbbüs qrupu adından qatıla bilərik. Seçkidə iştirak forması barədə qərarın senyabr ayına qədər qəbul olunacağı gözlənilir", çərşənbə günü Trend -a AYP sədri Mais Güləliyev bildirib.
Trend -un arayışı: Azərbaycanda bələdiyyə seçkisinin bu ilin dekabrında keçirilməsi nəzərdə tututlur. Azərbaycanda bələdiyyələrin sayı 2757-dən 1766-ya enib.
Güləliyevin sözlərinə görə, "yaşıllar" 50 bələdiyyə üzrə namizədlər irəli sürmək niyyətindədirlər.
"Partiyanın bütün bələdiyyələri əhatə etmək üçün kifayət qədər potensilaı yoxdur. 50 bələdiyyə üzrə bir-iki namizəd irəli sürməyi nəzərdə tuturuq", o deyib.
Yaşıllar Partiyasının bələdiyyə seçkisi ilə bağlı siyasi partiyalara müraciətinə gəlincə, Güləliyev bildirib ki, müraciətlər artıq partiyalara təqdim olunur.
"Müraciətdə partiyalara Azərbaycanda ictimai-siyasi vəziyyəti müzakirə etmək, bələdiyyə seçkisiöncəsi bələdiyyə idarəediciliyi ilə bağlı problemlərin identifikasiyası və seçki ilə bağlı müxalifət düşərgəsinin seçkiyə getmək imkanının araşdırılması təklif olunub", AYP sədri deyib.
Trend -un arayışı: Azərbaycan Yaşıllar Partiyası 2006-cı ilin dekabrında yaradılıb və hələ Ədliyyə Nazirliyində dövlət qeydiyyatına alınmayıb.
Məqalə müəllifi ilə əlaqə ünvanı: [email protected]
...